eSefarad Noticias del Mundo Sefaradi
Suegra kurioza
Avía una suegra ke kería ver si sus tres elmueras le kerían bien.
Un día ke una de eyas vino a vijitarla, eya le disho: «Vo ir al río al lado de kaza a tomar el karpuz ke metí a renfreskar…Ya estó viniendo.»
Kuando estuvo ayá entró a l’agua i empesó a gritar: «Me kaí al río! Salvame!!»
La elmuera ke sintió esto, se kitó el fostán i korrió al río i la «salvó».
La suegra kijo amostrarle su gratitud i le mandó en regalo un otó último model.
Después de unos kuantos mezes la suegra izo la mizma koza kon la sigunda elmuera, ke la «salvó» i resivió i eya un otó mizmo del de la primera.
Kuando vino la tresera elmuera, las kozas fueron en manera diferente, porké ésta no se emosionó de los gritos de la suegra i la deshó en el río, asta ke se murió.
No pasaron ni dos días i la tresera elmuera resivió un sertifikado kualmente su suegro le mandó una vila maraviyoza, para demonstrarle su gratitud.
Kontado por MATILDA KOEN-SARANO – 2018
———————————————————————-
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
