eSefarad Noticias del Mundo Sefaradi
La kompetisión de los tósigos
El Rambam era doktor grande en Mitsrayim. Ayá los otros doktores, ke eran muzulmanos, se enselavan muncho d`él i lo kerían matar.
Vino el doktor grande d`eyos, le disho al rey: «Azeremos una kompetisión: el doktor ke va saver dar el tósigo mas fuerte, va ser el doktor del rey.»
El rey achetó, i fue dechizado ke este doktor va dar emprimero él su tósigo al Rambam.
El Rambam ya entendió ke akel doktor le va dar un tósigo muy muy fuerte. Vino, tomó un tósigo kontra el tósigo ke akel le iva dar, i se lo bevió. Entonses kuando el otro doktor le dio akel tósigo tanto fuerte, al Rambam no le afitó nada, porké ya se avía aprontado.
Agora vino la ora ke le dé él el tósigo al otro doktor.
Todos stavan en la guerta del rey, asperando de ver kualo va dar el Rambam al otro doktor. Disho el rey: «Agora es el tor del Rambam de dar el tósigo.»
Kualo izo el Rambam? Aparejó un grande paketo, emburujado kon papeles i papeles i papeles…i ariento, en medio, metió un bokaliko.
El Rambam tomó una pala de orno, metió el paketo enriva i se la pasó de leshos al kushi, ke se la dé al otro doktor.
Este sta mirando ke la pala se está aserkando a él. Ya l`empesó a batear el korasón: tah, tah, tah…
El otro doktor tomó el paketo kon las manos ke le stavan tremblando. Avrió un papel i vido ke ay entr`un papel… i entr`un papel… El korasón ya le va a patladear!
Kuando yegó ariento, vido un paketiko. Ariento del paketiko avía un bokaliko. Fasta ke avrió el bokaliko, ya se le tomó el korasón i se murió.
Entonses el Rambam tomó el bokaliko, lo avrió, bevió un sorvo i le disho al rey: «Sinyor rey, keres gostar? Es agua kon asúkar!»
Se maraviyó muncho el rey i le disho: «Si esto no es tósigo, porké este ombre se murió?»
Le disho el Rambam: «Fue el espanto ke lo mató, sinyor rey!»
Ansí de akel día en delantre el Rambam se izo doktor del rey.
Kontado por KOHAVA PIVIS – 1996
Redaktado por MATILDA KOEN-SARANO
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
