Las Notas de Matilda – KONSEJIKA: Kuanto al kilo

Kuanto al kilo

Un kuple marokano, en su viaje al estranjero, se enkontro kon un sheh de la Arabia Saudita. El sheh se namoro de la mujer i no pudo kitar los ojos de eya. A la fin el se adreso al marido i le disho:

-«Siente, tu mujer es la mujer mas ermoza ke yo vidi en mi vida. Si achetas de renunsiar a eya i ke yo me kaza kon eya, te vo dar un montante en oro puro, ke vale su pezgo.

El ombre penso i penso i le disho:

-«Dame dos semanas.»

-«Bueno,» disho el sheh, «keres pensar»?

-«No,» disho el marido «kero azerla engodrar!»

Kontado por ELISHEVA VENTURA- 2018
Traduizido por MATILDA KOEN-SARANO

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…