eSefarad Noticias del Mundo Sefaradi
ENVITASION EMPREVISTA
Avía un ombre ke tinía un posto de lavor ande no ganava ni muncho ni poko. Un día para amigarse al patrón, lo yamó a komer a su kaza para la noche, en alavando la kuzina de la mujer.
Kuando vino i le disho a la mujer ke envitó al patrón a komer, eya se metió las manos en los kaveyos: «Kualo v’azer?!» disho, «Bre, mi ombre, kualo izites! Tengo sólo unos garvansos prontos! No tengo nada mas!!».
Le disho el marido : «No ay problem! Tú vas aprontar la meza. Kuando va vinir el musafir yo me v’asentar kon él. Tú vas a ir a la kuzina i vas a’mpesar a yorar. Yora, yora, yora, yora! I vas a vinir yorando i me vas a dizir: No saves kualo me afitó. Me se kemó la kumida entera! Lo ke me kedó es sólo unos garvansos! I ansina los vas a traer los garvansos, ke son muy buenos, i mo los vamos a komer».
Disho la mujer: «Bueno! Porké, no tengo ni el tiempo de aprontar otras kozas, ni stan los magazenes aviertos para ir a merkar, ni pará muncha no tenemos». I ansí fue ke la mujer, muy trankila, metió a keyntar los garvansos.
La mujer metió una meza maraviyoza. Vino el patrón i se asentó a la meza kon el marido i los dos se metieron a asperar ke la mujer truyera la kumida.
Fue la mujer a la kuzina i empesó unos yoros … unos yoros … ke se stavan sintiendo fin al otro mundo.
Le dizie el marido: «Ven, hanum, dí kualo afitó!».
La mujer … nada! Sta yorando i no sta viniendo!
A la fin fue el marido a la kuzina i le demando a la mujer kon boz fuerte, para ke sintiera el patrón : «Dime kualo te afitó!».
Le disho la mujer : «No demandes! Me se kemó toda la kumida!».
«Pasensia! Kualo vamos azer?!» le disho el marido, «Trae los garvansos!».
«No entenditis!» le disho la mujer, «Es los garvansos ke me se kemaron!».
Kontado por Miriam Raymond
Notado por MATILDA KOEN-SARANO – 2018
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
