eSefarad Noticias del Mundo Sefaradi
Los ojos de Shnéler
Una vizina me izo koneser a Israel (ke después se izo mi marido).
Para konesermos, kaminimos endjuntos por el kamino de Shnéler (kartié de Yerushaláyim): ir, vinir, ir, vinir por muncho tiempo, porké era un lugar muy chiko, i kiríamos ke pase muncho tiempo, asta ke mos vamos a koneser bueno bueno!
La vizina ya me disho: «Mira, Ester, esti mansevo no es para djugar. Esti kere kazar. Esti ti va koneser, pishín se va kazar!»
I mozós, bemet, no kiríamos un mansevo ke se djuge de mozós! Kiríamos uno ke ívamos a kaminar kon él una simana, dos, tres, un mes… i kazar! Ansina era.
Dizían: -Es mansevo bueno, tiene ufisio! – Skapó!
I stuvimos va i ven a pie en Shneler. Ayí avía tamién un lugar de glida, i mos asentimos, kumimos ayí una glida. Stava muy muy ermoza la konosensia primera!!
I después, kuando afitava en vezes ke yo no eskuchva kualo dizía mi marido o ke no l’agradava la kumida mía, me dizía: – Mira, Esterenika, tú mírame kon akeyos ojos de Shnéler!! No me mires kon los ojos d’agora. Kon akeyos ojos de Shneler mírame!»
Kontado por ESTER LEVY – 1987, Yerushaláyim
Notado i redaktado por Matilda Koén-Sarano
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
