eSefarad Noticias del Mundo Sefaradi
La djusta enterpretasión
Avía una vez un ombre ke se hue a lavorar en otra sivdá, leshos de su kaza. En akel tiempo no tinía lavoro en su sivdá. En akeya sivdá lavoró, lavoró i akojó una buena stifa.
Una demanyana vido a un amigo, le disho: «Stas indo a tala sivdá ande sta mi mujer? Toma estas parás i daseselas a eya.»
Le dio sien dukados i al lado d`eyos una karta, ande skrivió ansina: «Lo ke keres para ti toma i da a mi mujer.»
Este shalíah pensó: ‘Lo ke kero para mí?’ Tomó para sí los noventa i mueve dukados, i vino le dio un dukado a la mujer.
Disho la mujer: «Kualo`s esto?! Esto m`embió mi marido? Un dukado?! T`alokates? Ay tres mezes ke sta lavorando ayá!…»
Le disho él: «Na, ansina skrive él mizmo: – Toma lo ke keres para ti, i da el kusur a mi mujer. – i yo te lo dí a ti.»
«No!» disho la mujer, «Esto no puede ser!»
Hueron al rabino. El rabino sintió lo ke le kontó kada uno de eyos.
Le disho el rabino al ombre: «Ande sta la karta del marido de esta mujer?»
Miró ke stave skrito: » Lo ke keres para ti toma i da a mi mujer.»
Le disho el rabino al ombre: » Lo ke keres para ti tú, esto toma i da a la mujer!»
Kontado por KOHAVA PIVIS – 1996
Notado i redaktado por Matilda Koén-Sarano
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
Delicioso resulta siempre leer «meldar» los kuentikos que nos brinda nuestra kerida y admirada Matilda Koen Sarano, como este último, que pone de relieve la importancia de accentuar debidamente , de modo a poder interpretar de manera correcta el sentido de un téxto …
no nos quedemos pues solo con lo simpático y anecdótico de esta historieta …
Saludos para todos …