eSefarad Noticias del Mundo Sefaradi
Kada uno en su lugar
And’avía de ser de un rey, ke tinía un ratón, ke bivía en su palasio en un kafés. Kada día él le azía dar a komer kumidas muy buenas, ma el ratón se iva aflakando.
Nada no valía. I un día el rey vido ke el ratón estava para murir.
El rey izo yamar a su konsejero i le disho: “Mira, yo no se mas kualo azer. Le sto aziendo dar las mijores kumidas, ma el ratón, no sólo ke no se está engodrando, ma s’está también aflakando, i parese k’está para murir.”
Le disho el konsejero: “Sinyor rey, échalo al kabiné i verás ke se va arrebivir.”
“Al kabiné!!” disho el rey, “No puede ser!”
“Verás!” le disho el konsejero.
El rey en prinsipio no lo kijo azer, porké lo kería bien al ratón, ma kuando vido ke no ay hayre i ke el ratón s’está muriendo de verdá, lo echó al kabiné. I kuala fue su maraviya, kuando vido ke el ratón, en lugar de murirse, se arrebivió.
De ande se veye ke kada uno está bien en su lugar.
Kontado por MATILDA KOEN-SARANO – 1998
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
