eSefarad Noticias del Mundo Sefaradi
El sharope
Mi mamá azía un grande plato de sharope i lo ponía ensima a un armario.
Yo me suvía en una siya, metía el dedo, arrankava así… i me lo komía.
Komo el sharope se va así desplasando i se esparzía en el plato, no siempre se notava lo ke yo azía.
Pero a vezes yo komía demaziado i de pronto veía el plato, ke si antes estava asta aká, agora estava asta ayá…
Entonses mi mamá dezía: «La kavesika, Refael, la kavesika ke te kayga!»
Klaro! Porké eya veía ke todo me lo iva komiendo yo! I no me lo komía de golpe. Avagariko avagariko yo me lo iva komiendo, asta ke kedava muy poko.
Kontado por RAFAEL VALANSI – 1992, Buenos Aires
Notado i redaktado por Matilda Koén-Sarano
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
En kaza lo hasia mi abuela Estreya Galindos, le mitia almendrikas, rayadura de limon, i era kapache de aser esto mas las roskas ke finya deshava kreser, i dempues las mitia en el tanur kon guevo batido, i mueses. Tenya una pasensia, de ke yo me metia en un bankito para ver todo i meter las manos de ke keria finyr i sentirme que agora ya pudia estar en estos menesteres.
Mi vida la pasi entre estas dos nekosheras mis dos avuelas, la una no parava de kroshetear, i la otra de kusinar, avlavan las dos ladino. Gracias pro haverlas tenido.
Anyada dulse i klara para todos vosotrosh!