eSefarad Noticias del Mundo Sefaradi
El ombre i el malah amávet
Avía un ombre ke le vino el malah amávet i le disho: Otras ventikuatro oras yo v’a vinir a tomarte!»
Se espantó muncho el benadam, tomó el otobús i se fue al aeroporto de Lud. Se suvió al avión i partió para París. Abashó del avión, lo ve al malah amávet en la puerta de la duana.
Korrió, se suvió al shemén-de-fer, se fue a Calais. Kuando abashó del shemen-de-fer lo ve al malah amávet, ke está ayá.
Se suvió al vapor, pasó a Londra. Abashó a Londra, lo ve al malah amávet ayá.
Korrió al aeroporto, suvió al avión, partió para Washington. Kuando abashó del avión lo ve al malah amávet en la puerta, mirando la ora de la mano.
Le disho el malah amávet: «Ya vino el tiempo! Ande ke sea ke te vas a fuyir, vas a vinir kon mí! No ay remedio!»
Kontado por RASHEL PERERA – 1984
Notado i redaktado por MATILDA KON-SARANO
Kada semana, Matilda Koen Sarano mos konta sovre kuentos, muzika i otras kozas ke eya va arekojendo…
