eSefarad Noticias del Mundo Sefaradi
Dos linguas
Un gato estava korriendo detrás de un ratón, para aferrarlo i komérselo, ma el ratón korrió mas presto, entró en un burako en la paré i se metió a asperar ke el gato se vayga.
Ensupitó el ratón sintió la boz de un perro ke ladrava. Pensó: ‘Si ay ayá un perro es ke el gato ya se fue.’ i salió afuera.
El gato lo aferró pishín. Le demandó el ratón, antes ke el gato empese a komérselo: «Ma komo puede ser? Yo sintí boz de perro!»
«E,» le disho el gato «en este paíz se deven saver dos linguas, para poder ir adelantre!»
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
