eSefarad Noticias del Mundo Sefaradi
Demanda fatal
Un prens arivó a la edad de kazarse i disho a la madre: «Mamá, tópame una buena novia!» I la madre – la reyna – le bushkó una novia adapta.
Se prezentaron munchas prensezas i la reyna les izo un ekzamén.
Eya demandó a la primera prenseza: «Dime, kuantas vezes se enshagua el arroz, antes de gizarlo?»
«Tres vezes!» le disho la prenseza.
«Tú no sos para mí!» le disho la reyna i la mandó.
La reyna demandó a la siguna prenseza: «Dime, kerida, kuantas vezes se enshagua el arroz, antes de gizarlo?»
«Sesh vezes!» le respondió la prenseza.
«I tú no sos para mí!» le disho la reyna i la mandó.
Entonses las kandidatas disheron «Siete vezes», «Diez vezes», ma ni esto no kontentó la reyna.
Asta ke una, a la demanda de la reyna disho: «Ke kere dizir kuantas vezes? Kuantas vezes se keren para ke el arroz este limpio!»
«Tú sos para mí!» disho la reyna i la deskojó para ser la novia de su ijo.
Kontado por MATILDA KOEN-SARANO – 2015
Kada martes, Matilda Koen Sarano mos konta sovre kuentos, muzika i otras kozas de su eskritura. Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino
