eSefarad Noticias del Mundo Sefaradi
Kada martes, Matilda mos kontara sovre los kantadores y kantadoras de la muestra muzika.
Los tekstos ke kompartimos koresponden a los programas de la seksion en ladino de Kol Israel del siklo ke eya mizma melda kada djueves
Flory Jagoda
(Sarayevo, Bosnia i Herzegovina, 1925)
Flory Jagoda nasió en Sarayevo en el 1925 en una famiya djudeo-espanyola. Es una kantadera, gitarrista i kompozitora djudía amerikana, muy konosida por su enterpretasión de los kantes en ladino, ke se ambezó de su nona. Kantes ke pasaron de madre en ija por jenerasiones.Eya kresió adientro de la tradisión djudeo-espanyola, en la famiya muzikal Altarás. Además se familiarizó kon la kultura de los Balkanes. Durante la Sigunda Gerra Mondial fue internada en la izla de Korcula en la Kosta Dálmata. Su familya se fuyó a Italia ande eya enkontró al soldado djudió amerikano Harry Jagoda, kon
el kual se kazó i imigró a los Estados Unidos, ande mora en la rejión de Washington D.C.
Flory izo una emportante karriera kon su erensia muzikal, aziendo arranjamientos i kompozando kantigas muevas en ladino. A parte de pasar esta tradisión a sus ijos i inyetos, ke kantan kon eya, ambezó a munchos estudiantes komo performar la múzika en ladino. La primera enrejistrasión de Flory Jagoda fue el disko «Kantikas de mi nona», ande eya aparese komo una ija djoven, ke kanta las kantigas de su nona. Después del sigundo disko «Memorias de Sarajevo», eya publikó «La Nona kanta», en veste de una nona ke kanta kantigas ke kompozó para sus inyetos. Flory es una líder del revival del ladino, i sovre todo de su múzika. Dos de sus kantigas arivaron a ser konosidas en todo el mundo: la kantiga de Hanuká «Ocho kandelikas» i «La yave de Espanya». En el 2002 eya resivió la «Lifetime Honor» por la «National Heritage Fellowship» i el «National Endowment for the Art» por sus esforsos en el tramandar la tradisión muzikal djudeo-espanyola. En el mizmo anyo la Antica Petrovic produizió un filmo dokumentario sovre Flory i su estoria. A pezar del fakto ke ya pasó los 80 anyos, eya kontinúa a dar lisiones, a eskrivir i i dar konsertos. Su múzika kontinúa a difundirse por medio de sus CDs i su livro «The Flory Jagoda Songbook».
