Las Notas de Matilda – Kantadores de la tradisión djudeo-espanyola: Viviana Rahel Barnatán

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

Viviana Rahel Barnatán
Kantadora, kompozitora i poetesa
(Argentina – Madrid)

Dize Viviana Rahel Barnatán: «En este  maraviyoso viaje ke es la vida konosí muncha djente, ke ayudí a reenkontrarse kon sus propias raízes de su pasado djudió, i munchos de eyos oy día son mis amigos”.
Viviana Rahel Barnatán, ija de Matilda Gini de Barnatán, es aktrís, artista plástika i autora de poezías i kantes en espanyol i en djudeo-espanyol. Nasida en Argentina en seno de una famiya sefaradía, se ambezó la lingua i el kansionero de kriatura adientro de la tradisión de su famiya, i se fraguó una sólida baza, lavorando en diversos kampos de la kreasión artístika. Es sub –direktora de la Emisión Sefarad de la Radio Eksterior de Espanya, onde lavora de kuando tinía 16 anyos, interpretando un ancho buketo de versiones del kansionero sefaradí  a kapela, komo es de uzo en la tradisión de estos kantes. Su madre, Matilda Gini de Barnatán, investigadora i konosedora del pasado djudió en Espanya, es la persona de la kuala eya se ambezó la lingua ke eyas rekrean en kada programa radiofóniko, ke las dos komparten dezde 21 anyo en la Radio Eksterior de la Nasional de Espanya,  difundiendo esta rika kultura kon entrevistas, múzika, aktividades del mundo sefaradí i djudió.
Kon el objektivo de engrandeser i difundir tanto la kultura djudía komo la erensia i la lingua sefaradías, nasió la Asosiasión Kultural “Lus de Sefarad”, ke Viviana Rahel fondó djuntos a su madre, para krear muevos proyektos: konferensias, enkontros, publikasiones, diskos de múzika i poezía en djudeo-espanyol. En el 2005 editaron un CD de múzika sefaradía,  entitolado “En prinsipio”, ke tuvo un grande sukseso sea en seno de los ke konosen su propia erensia,  sea en seno de los ke se enkontran kon eya por la primera vez.
Viviana Rahel viene segida por anyos por el Rabino de la Komunidad Djudiá de Madrid, Rav Moshé Bendahán, ke la akompanya dezde anyos en su viaje adientro de la realidad del djudaízmo.  Su poezía i sus kantigas reflektan su amor por el djudaízmo, por el ladino i por ken komo eya bushka un razón para bivir, entender ken somos i komo yegimos a este mundo. Su CD «En prinsipio» de kantes en ladino, está empapado de amor por la tradisión  djudeo-espanyola, ande pasado, prezente i futuro se mesklan en armonía, aziendo sovresalir la ermoza i freska boz i la ezmoviente enterpretasión de Viviana. Ma eya no es sólo una kantadora, si no ke es una kompozitora de kantigas también, komo vimos en sus dos kantigas ke arivaron al ancho públiko: «La novia», ke ganó el sigundo premio en el Festiladino del 2004, i «Letra de amor», ke suvió a la final del Festiladino del 2005.