Las Notas de Matilda – Kantadores de la tradisión djudeo-espanyola: Soledad Bravo

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion en ladino de Kol Israel del siklo ke eya mizma melda kada djueves.

  
Soledad Bravo
(Logronyo, Espanya – Venezuela)

Soledad Bravo nasió en Logronyo (Espanya) en el 1943. Su padre era un espanyol republikano ke se transferó en Venezuela kuando su ija era deynda chika. A la edad de 24 anyos Soledad  empesó a estudiar arshitektura i filozofía en la Universidad Sentral de Venezuela, ande empesó sus performansias, kon la interpretasión del «Amor de Don Perilimplin con Belisa en su jardín» de García Lorca. Esto la trusho a ke una emportante jurnalista venezuelana le diera la oportunidad de apareser kada demanyana en un programa de televizión yamado «Buenos días». Un anyo después en el 1968 eya publikó su primer albom entitolado «Soledad Bravo canta» ke tuvo un sukseso imediato i izo de eya una star en Venzuela i en otros paízes del Sud Amérika. En los anyos del 1969 al 1971 eya publikó dos albomes de kantes populares i tradisionales sud amerikanos, inkluyendo material de Atahualpa Yupanqui, Violeta Parra, Daniel Viglietti, Vinicius de Moraes, Baden Powell, Alfredo Zitarrosa  i Joan Manuel Serrat, kantando sólo komo le diktava su korasón, i biviendo i kantando en Evropa i en las Amérikas. Después ke publikó un albom doble entitoldo «Soledad Bravo en vivo», Soledad partisipó al Festival popular «Agua Dulce» en Lima (Perú), ke konsakró su lejenda. En el 1976-77  se fue a Espanya ande aparesió en la televizión nasional kon el muy briyante gitarrista Manolo Sanlucar. Muy ezmovida por el akolio del públiko espanyol, Soledad dechizó de kedar en Espanya por 4 anyos i lavorar ayá. Eya kantó i enrejistró entre Roma i Madrid los mijores poemas de Rafael Alberti. En el 1980 rejistró una koleksión de antikos kantes djudiós de Andaluzía, los «Cantos Sefardíes».  En el 1981  trokó su repertorio i rejistró en New York un albom de material karibeano, produsido por el grande Willie Colon.  En Fransia eya es bien konosida  por «Hasta siempre» de Carlos Puebla, un imno kubano a Che Guevara, ke eya rejistró en el 1968 en Caracas, i ke 30 anyos después, repropozado en Fransia, suvió ayá i vendió mas de 50,000 kopias. Esta «Latin Diva», komo viene yamada,publikó mas de 30 albomes, i kantó en todo el mundo. Su repertorio es una biva meskla de fiereza, de ritmos karibianos i latinos, de elejías sefaradías i de baladas ke keyntan el korasón. Eya es konsiderada una de las mijores bozes de la Amérika Latina. Soledad es la sola kantadera latina kapache de pasar de un estil al otro, kantando en uns ekstraorinaria variedad de programes de kantigas latino-amerikanas, del tango argentino al afro-jazz.