Las Notas de Matilda – Kantadores de la tradisión djudeo-espanyola: Ran Elirán

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

Ran Elirán
Kantador i kompozitor de palavras i melodías
(Haifa – Israel, 1937)

Ran Elirán (o Ron komo es konosido al estranjero) nasió en Haifa en el 1937 kon el nombre de Menahem Leizerovitch, yamado  Leizer también. El es konosido komo el «Israel’s Ambassador of Song» (Embasador del Kanto de Israel), i resivió el Premio «El Violino de David» por su kantiga «Sharm-e-sheih» (1967).
Ran izo su servisio militar en el Grupo del Folklor del Náhal, ande enkontró a la kantadora Nehama Hendel,  ke servía en el Grupo Muzikal del Náhal. Durante el servisio militar los dos tanyeron endjuntos en las oras líberas.  Kuando salió de la armada, paralelamente a sus estudios en la Universidad Ebrea de Yerushaláyim, aparesió solo, akompanyándose kon la gitarra i el akordeón. En el 1958 arivó a Israel el moderator amerikano de televizión Ed Sullivan, ke estava bushkando djóvenes talentos. Para la kompetisión, Ran i Nehama se adjuntaron en el duo «Ran i Nama»,  fueron deskojidos a partisipar el programa i tuvieron un grande sukseso en los Estados Unidos en los anyos ’60. Durante este periodo gravaron 2 albomes endjuntos.
En el 1967 Ran partisipó al Festival del Kanto en Israel, ande interpretó dos kantigas, de las kualas  la sigunda «Tamid mehadásh» (Siempre de muevo) ganó el sigundo premio. En el mizmo anyo, pishín después de la Gerra de los Sesh Días, kantó dos de los kantes mas populares de akel tiempo: «Sharm-e-sheih»i «Ahziki lanu etzbaot» (Tenmos tus dedos), ke son de su kompozisión i aparesieron en el albom de las kantigas de la gerra «Yerushaláyim shel zahav», ke es konsiderado uno de los albomes mas vendidos en el Estado de Israel. En los anyos ’70 él se dedikó a los estudios de sinemá en la Universidd de New York, i en el mizmo tiempo aparesió en klubes reputados  en la sivdad al lado de kantadores famozos komo Harry Belafonte.  El izo munchos turs en el mundo i aparesió en munchas linguas, i en programas de televizión en Israel i en Amérika. Tuvo performasias  en el Carnegie Hall en NewYork, en el Kennedy Center en Washington en el Albert’s Hall en Londra, en Montreal i en Los Angeles. En okazión de asasinato de Yitzhak Rabin en el 1995, él endjuntos a Gad Yaacoby, ke era el embasador de Israel en las Nasiones Unidas, eskrivió una kantiga sovre la vida del defonto Primer Ministro, i la intepretó delantre de un públiko de 200,000  personas en la «Plasa Rabin»en Tel-Aviv, komo parte de un bivo tributo nasional  al  líder kayido. En el 1997 Ran Elirán kantó en Bazel, en el Sentenario del Primer Kongreso Sionístiko, su kompozisión, tributo a Theodor Herzl, «If you will it», akompanyado por la Orkestra Sinfónika de Bazel. En el 1999 él fue el  envitado de onor en el «Budapest  Festival of Freedom», i su kompozisión se izo el kante ofisial del Festival. En su mansevés Ran publikó una kaseta de kantigas, entitolada semplemente «Ladino», ke inkluye las kantigas mas ermozas i populares en ladino, ke él kanta kon amor, nostaljía i umor.