Las Notas de Matilda – Kantadores de la tradisión djudeo-espanyola: GUY ZU-ARETZ

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

GUY ZU-ARETZ
Aktor, rejisor i moderator de TV, muzisiano i kantador
(Tel-Aviv, 1973)

Guy Zu-Aretz nasió en Tel-Aviv en el 1973. Estudió en la Eskola Elementar Gordon i en el Liseo «Ironí hey». Sus djenitores nasieron en Israel. Sus nonos de parte de madre, Yaakov i Pnina Zariha arivaron de Salonik i de Estambol en el 1924 a los kartiés Florentín i Shapira de Tel-Aviv, mientres ke sus nonos de parte de padre arivaron en el 1932 de Tripoli (Libia) kon el nombre Suarez, ke ebraizaron en Zu-Aretz, i se establesieron en Ramat Gan.

Kuando terminó el liseo, Guy fue resivido en el grupo muzikal de la aviasión, ande sirvió por tres anyos i medio i aparesió en duo kon Din Din Aviv. Guy estudió resitasión i dezvelopamiento de la boz.  A la edad de 24 anyos entró a la «Habima» en el «Bustán Sefaradí», la piesa del sinkén Prezidente del Estado Yitzhak Navón «. Kontinuó a resitar en las piesas «Una vista del ponte», «El Diario de Anna Frank», «Tel-Aviv Haktaná (La chika Tel-Aviv)».  Además  aparesió en  komedias muzikales, komo «Mary Lu», «»Laléhet ad asof (Ir asta la fin)», «Barnashim Ve-hatihot (Mansevikos i muchachikas)» (2006),  «Parparim em hofshiim (Los  papiyones son liberos)» i mas. Al lado de esto él djugó en serias de televisión, komo «Ramat Aviv gimel» (1997), «Tipul Nimratz (Terapía enérjika)»  i «Hashir shelanu» (Muestro kante). En estos últimos anyos Guy es el moderator del programa muy popular i reushido de «reality» «Surbivensia». En el 2002 Guy se kazó kon la aktrisa Yael Bar Zoar. Eyos tienen dos kriaturas.

Durante todos estos anyos, al lado de su kompozisión i performansia de kantigas en ebreo, Guy lavoró sovre su múzika interior kon la kolaborasión de su ermano Roy Zu-Aretz,  i kon él kreó el proyekto familiar ke aúna los lugares de su chikés kon el kante del ladino de su nona Perlika i los imnos del kal sefaradí de los olim de Libia. En el Festival de Primavera  prezentará un espektaklo muzikal personal de kantes i kuentos de sus kaza, ke es un viaje en las raízes, en el kual Guy aze suvir a la shena, al lado de las kantigas kantadas a sus tiempo por Zohar Argov,  Ahuva  Uzeri i mas, las melodías en ladino i los imnos ke están adientro de su alma. El produktor de este espektaklo es su ermano Roy Zu-Aretz ke es un muzisiano i aranjador muzikal yeno de talento, ke lavoró para Rita, Meir Banay, Dani Sanderson, i mas. Los dos ermanos endjuntos prezentan sovre la shena sus kaza muzikal personal, akompayados por tanyedores.

Matilda Koen Sarano