Las Notas de Matilda – Kantadores de la tradisión djudeo-espanyola: Aliza Aviv

Kada martes, Matilda Koen Sarano mos konta sovre los kantadores y kantadoras de la muestra muzika.
Los tekstos ke partajamos koresponden a los programas de la seksion «Shabat a la noche»  de Kol Israel  del siklo ke eya mizma melda despues del Notisiario en Ladino .

 

Aliza Aviv

Kantadera
(Israel)

Aliza Aviv, es spesializada i performa sovre todo en el kanto del mundo, de Gresia i del Balkán, en ladino, múzika jitana i kanto ebreo original. Eya kresió en Tel-Aviv i Bat-Yam. Sus raízes se topan en Salonik i Yerushaláyim. Empesó a apareser komo bayladera de balet i a la edad de 15 anyos aparesió kon su ermano, Shlomik Bar-Oz, ke era la estreya del grupo «Hanesikhim» (Los prinsipes), ke la izo partisipar a su kanto. Oy Bar-Oz kolabora kon eya kon su kanto en la reprezentasión ke integra el kanto de Gresia kon  el rock de los anyos sesenta. Su servisio militar Aliza lo izo en el Grupo de las Ijas de la Fuersa Aerea. Después de su servisio en la armada, partisipó a las komedias muzikales «Ha-Rotshildim» (Los Rotschild), «Al tikrá li shahor» (No me yames preto), «Pikud Dizengoff» (Komando Dizengoff). Además eya performó kon Mutzi Aviv, komo Duo Aviv i se unió al Grupo Ha-Shagririm (Los embasadores).Oy Aliza Aviv aparese en noches de kanto del mundo, kanto de Gresia i ladino en «Sipur ahavá yevaní» (Kuento de amor grego) kon Shimón Parnás, kon el kual izo una reprezentasión algunos anyos atrás en los «Días de leche i miel» en la Mar Muerta.  Munchas vezes izo partesipar en sus reprezentasiones a su ija, Din Din Aviv, komo kantadera envitada. Empesó kon un proseso ke se dezvelopó kon el tiempo. Agora kada una de eyas kontinúa su karriera personal. Su ijo Dan Aviv es un entrenador i pintor yeno de talento, i es un artista orijinal.

Aliza Aviv aparesió en la Sala de «Alhambra», kon los «Pniné ha-Múzika» (Las perlas de la múzika): Haim Romano (buzuki), Shlomik Bar-Oz (bass i armónikas), i otros muzisianos famozos.

Haim Romano, gitarrista de los mas famozos i rekuestos en el rock israelí, fue uno de los primeros en Israel ke unió kon naturaleza enfluensas de la múzika grega i áraba kon el rock oksidental. El es konosido komo tanyedor de buzuki i baglamá, i aparesió entre otras kon Yeudá Poliker,

Aliza Aviv,  ke a parte de kantadera grasioza i yena de talento, es i envestigadora del kanto del Balkán,  konvensió a su ermano de unirse a eya, i eyos dan una nochada de kuentos de Florentín,  la vieja i perfumada Florentín kon su autensidad partikolar a eya, kon los boemianos i su vida nokturna enfloresiente, sus tipos, sus kumidas i sovre todo… sus kantes. Kantes gregos balkánikos, i naturalmente kantes muestros. Una nochada ke es una estreya en los festivales, en las nochadas de narrasión de kuentos, en los evenimientos de múzika del mundo, en los kafés de Yafo i su parajes. Esta mizma  reprezentasión fue dada i en Ramat Eliau.

 

Matilda Koén-Sarano, 2013