eSefarad Noticias del Mundo Sefaradi
Kada semana, Matilda Koen Sarano mos konta artikolos, kuentos i istorias.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
Kandelas de shabat
Un día, tadre de shabat, Rabí Hanina vido ke su ija está triste.
Le demandó Rabí Hanina: «Ija mía, deké estás triste?»
Le disho la ija: «Por yerro, me konfundí i ensendí las kandelas de shabat kon vinagre en lugar de azeyte. Me espanto ke no vamos a tener kandelas de shabat!»
La konsoló Rabí Hanina, diziendo: «Ija mía, deké te estás preokupando, de kualo te estás espantando? El ke disho a la azeyte de ensenderse, dirá al vinagre de ensenderse.»
I se konta ke las kandelas estuvieron ensendidas en sus kaza durante todo el shabat.
(Del Midrásh)
(Traduksión al ladino de Matilda Koén-Sarano, 2012)
