eSefarad Noticias del Mundo Sefaradi
Kada martes, Matilda Koen Sarano mos konta sovre kuentos, muzika i otras kozas de su eskritura.
Los tekstos ke partajamos koresponden a los programas de la seksion «Shabat a la noche» de Kol Israel del siklo ke eya mizma melda despues del Notisiario en Ladino .
El rey dezesperado
El rey de un grande imperio, en una de sus konkistas, arivó a un gran kastiyo vizino, i kuando se yevó las djoyas ke avía ayá, topó ke entre eyas avía un grande aniyo de oro. Lo miró i vido ke en lugar de un grande briyante, avía un kapakito, i kuando lo avrió topó una chika kashika.
El rey estava muy kuriozo de saver porké izieron esta kashika. El pensó noche i día a kualo sirvía esta kashika i kualo podía azer kon eya. A la fin dechidió de reunir a todos los hahamim i dizir ke kada uno eskriviera en un papeliko muy chiko kualo kerría topar en un momento de períkolo de vida, para salvarse.
Kuando todos avían eskrito kada uno su papeliko, devían entregarlo al gran rabino, para ke deskojera el papeliko ke iva meter en la kashika del aniyo del rey.
El gran rabino meldó todos los papelikos, tomó uno de eyos i lo metió en el aniyo.
Pasó muncho tiempo, un día lo atakaron al rey i le tomaron el palasio i todo lo ke tenía, i lo kerían matar, ma él se fuyó i supo ke destruieron todo lo ke tenía.
Dezesperado el rey se kijo matar, echándose de una montanya abasho, ma antes se akodró de su aniyo i lo avrió, kitó el papeliko ke estava adientro de la kashika, lo avrió i lo meldó, i lo ke meldó le izo tornar atrás la vida.
En el papeliko estava eskrito: «Todo pasa i esto también va pasar».
Déspues de un poko el rey rekuperó su reynado i su palasio i tornó a ser feliz.
Kontado por MARIO SORIANO – 2012
Redaktado por Matilda Koén-Sarano
