Las Notas de Matilda – Kuento: Aspera a alegrarte!

Aspera a alegrarte!

Tres mansevikos moravan endjuntos en el apartamento al último etaje de un gratasielo de 50 etajes.

Un día tornaron a kaza i vieron ke la asansor estava bozeada. Kualo ivan azer? A mal de sus pezar, dechizaron de suvir a pie.

Empesaron a suvir i kon grande esforso arivaron al etaje numero 20. Se kedaron a repozar i uno de eyos kontó un kuento kómiko.

Después ke se riyeron, empesaron de muevo a suvir i finalmente arivaron al etaje numero 40. Ayá el sigundo d’eyos kontó un kuento de espantar ke los izo tremblar.

Bueno, se metieron en kamino otra vez i kon grande alegría suvieron los 20 eskalones ke les kedavan.

Kuando ya estavan para entrar en kaza, les disho el treser: «Amigos, tengo una koza de dizirvos: me apersiví agora ke la yave de kaza kedó en la aldikera del palto ke deshí ande el portalero, para poder suvir mas fasilmente.»

Kontado por SARA GOLSHAN – 2017
Traduizido i redaktado por MATILDA KOEN-SARANO

———————————————————————-

Kada semana, Matilda Koen Sarano mos konta sovre kuentos, muzika i otras kozas ke eya va arekojendo…