eSefarad Noticias del Mundo Sefaradi
YO I MI KAMERA
Un día yo estava en la bushkida de un apartamento. Entrando en el apartamento vide ke la mayoría de los mobles ya fueron retirados i tranportados. Las kamaretas estavan más o menos vazias. Sólo sovre el piso de una de las kameretas chikas, al lado de la biblioteka, notí un montón de fotografías ke aparamente fueron retiradas de un álbum i agora echadas sovre el parketo. Mi propózito era la konsiderasion ke las djentes ke echaron estas fotos las toparon inutiles i kerian despues echarlas en el sierko.
Aki es kuando me desidí de arekojer todas estas fotografías antikas i yevarlas a kaza. Ansí empeso mi idea de esta breva istoria, pormodo ke pensi ke es un pekado de tratar ansi fotos de famiya.
Yo bivi alrededor de un tiempo ke egzistia en los días antes del Internet i antes de kámeras dijitales. Las únikas razones de antes de tomar fotos eran para utilizar i para rekuperar imajes de personas, de kolores i kompozisiones para lo ke era entonses la pasión real komo artista o pintador.
.
Me ambezi ke el nasimiento de la fotografía se refería a inventar medios para apanyar i mantener las imajes produsidas por la kámera obskura.
El fotógrafo, en kaza o en su estudio, tomava fotos de personas ke kerian ser fotografiadas, ke eran populares, konosidas i afilu diskonosidas. Entre otro el fotógrafo tratava de aferrar parte o la famiya entera. Esto es la razon ke el tomava bastante tiempo de aresentar sus sujetos. Ansi i la dispozisión de la famiya, kaji siempre de djentes asentadas. Una forma ke el fotógrafo de antes no pudia apanyar el “snapshot”, la foto enstantané.
En el pasado, en okaziones espesiales, parte de la famiya, parientes i amigos eran sujetos konstantes ke fueron fotografiados para amostrar la istoria de la famiya, de la ke estavan orguliozos.
Mirando ansi atrás a estos días se puede dizir ke estas fotos fueron prezentadas i arekojidas para transmeterlas. Muncha djente konsideravan el album komo un trezoro por modo ke los albumes revelavan la istoria familial en la diaspora, en Evropa durante la Primera Gerra Mundial i muchos anyos después de estos tiempos.
Yo fue un fotógrafo amator desde ke resivi mi primera kámera Eastman para mi Bar Mitzva i kuando también entendi ke «La fotografía es una forma de sentimientos de tokar i de amar. Lo ke apanyates kon un filmo es para siempre.”
De mismo me akodro de chikas kozas ke son kompanyeras de la teknolojia de fotografia i de los tiempos ke mi nona, kuando en la absensia de mis parientes, fue el babysitter de mi ermano i de mi.
Antes de salir kon mosotros, kitava del almario los vestidos buenos, mos vistiya asegun el tiempo, en akordó de la lokasión i de la djente, mos dizia ke azer i no azer, mos enkomendava de no gritar, de no ensuzyar, de no eskonder kozas, de no ser fitildjis, i de rengrasiar.
Otra razón era para yevarmos al magazen de kalsados para mezurar muestros pies i para enkomendar muevos kalsados, o para yevarmos al studio del fotógrafo. Avuela tenía toda su famiya en Istanbul i de tiempo en tiempo eya les embiyava fotos de mí i de mi ermaniko.
En avlando de fotografia me akodro ke antes, el pasatiempo no era los sinemas, los konsiertos, los kafés o klubes. Las mujeres mas aedadas las asentavan sovre el minder, o las deshavan solikas. Ansi era zahut de vijitarlas. Mi grandmama ke era una persona sana, kultivada i de mismo enerjika, no se kontentava de enserrarse en kaza. Su grande mahpul era de irse a pie a vijitar sus amigas en el vizindado, o tomava un faeton, se enkargava kon su inyietos, i azia vijitas.
Al prinsipio yo no fui un fotógrafo afisionado mismo ke resivi mi primera kámera para mi Bar Mitzva. También me akodro de pokas kozas sovre la fotografia i de la muevas teknolojías de fotografiar.
Vino el tempo kuando las pinturas fueron remplasadas por las fotos de personas konosidas, VIP o de otras personalidades del governo. Estas fotos fueron enkolgadas en lugares ofisiales, kazas, studios, edifisios ofisiales, galerias, ekspozisiones i muzeos para ser vistos por la mayoría de la populasion.
Yo empesi a tomar fotografías del tiempo ke me rekuerdo asta kuando tenía 13 anyos, uzando la kámera de la famiya ke paresía a una kasha preta. Tenia un chiko kristal ke se puedía mirar a través de la konstruksion de la kámera.
No es kolay kon estas kameras de obtener un imaje stabilo porke apenas se apretava el boton de la kasha, era muy pezgada de mantenerla en una pozision stabila. La pelikula era mucho mas grande de la ke se utilizava mas tadre, Me akodro ke puedia tomar 12 imajes, la majorita en blanko i preto.
Kuando kumplí 17 anyos mi padre me regaló una kámera ke era moderna, yamada Petri 7. Esta kámera fue mucho más kolay de uzar por modo ke su konstruksion tenía un fotómetro. Me akodro ke me yevava la kámera a mi viaje anual de la eskola a Ein Gedi ande tomava la pena de travar fotos de las vistas i de mis amigos. La majoríta de los fotos estavan leshos de ser perfektas. En este viaje devo konfesar ke me enamori de la fotografía i a través de los anyos troki mis kámeras. Yo avia uzado las kámeras Canon. Por siguro ke empleyi una kámera de pelíkula normal ke después troki kon una kamera réfleksa i desde los últimos 8-10 anyos esto utilizando la kámera dijital Canon, trokando las lenses de gran angular a lenses de zoom. Avia después un trokamiente grande kon las fotos en kolor de las pelíkulas ke empesaron a ser utilizadas kon más frekuensia. A lo largo de los anyos, yo también tomi algunos kursos de fotografía ke me ayudaron a travar mas buenos fotos, También esto utilizando el «Photoshop Lightroom» ke es un grande englendje. Desde el anyo pasado viají kon grupos de fotógrafos en Israel i en el estranjero. Tomar fotos endjuntos es muy reushido i los profesores siempre mos dan “tips”.
Kero terminar mi artíkolo kon algunos rekuerdos de mi infansia. Rekuerdo ke saliamos ir a un fotógrafo muy konosido ke tenia un estudio chiko i obskuro en el Carmel Sentral, Su nombre era Sr. Faigeen. El estava detrás de una kasha grande kon su tripod. La kamera fleksible era kuvierta kon una ropa preta. Teniamos de asentarmos kayadikos asta ke mos aresentava i tomava muestra foto. También rekuerdo un evento kuando un fotógrafo fue invitado a muestra kaza, kuando yo tenía 5 anyos. El kería tomar fotos de mí ma yo me fuyi. Dainda tengo en mi tino este rekuerdo, de mi korrida en la kaya “Aviv” en Haifa (Israel)
Para terminar mi kuento vos kero anunsiar ke arekoji los fotos ke topi en el apartamento, los meti en una kasha en una kioshé del almario ke se topava en la kamareta de musafires. Ayi la kasha estava olvidada asta ke el amigo de mi ermano, Uri, vino a vijitarmos. Estava enkantado de muestra ospitalidad i al enkolgar sus vistidos en el almario, deskuvrió la kasha de las fotos de una famiya. Komo un fotógrafo miró a través de todas los viejas fotos. En supito deskuvrió la foto de una joven dama tomada por un fotógrafo en Odessa.
Entremientes Uri retorno a su kaza a Sao Paulo kon la idea definitiva de topar los lejitimos proprietarios de los fotos. Sovre todo el enkontró detrás de una de los fotos la manuskrita inskripsion “Bernstein”. Se akodro ke su tiyo ke se kazo kon una Bernstein, salio de mismo de Odessa i vino a bivir a Sao Paulo. En buskando la famiya de su tiyo i entremientes metiendo dos i dos endjuntos, presto salio ke las dos famiyas, de su tiyo i de las fotos eran serkanos.
Agora era el tiempo de vijitar la dicha famiya de las fotos.
De esta manera el trezoro de viejas fotos fue rekuperado i grasias a las fotos se reunieron las famiyas i se toparon los lejítimos propietarios de las fotos.
Las fotos reunieron después de anyos una famiya. El mundo es chiko
Rivka Abiry
Rivka Abiry partaja kon mozos sus konsejas, Estos kuetizikos son kontados por Rivka kon la grasia ke ya mos tiene akostumbrados.
Fuente: Enviado por Rivka ABIRY / Haifa
