eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
LAS FLORES SE SEKAN, MA LA VIRTUD KEDA
Es kaji la ora dodje del medio dia i todo esta trankilo a mi entorno, fina ke la kampana de la eskola anunsioanda la fin de la jornada eskolar. Los ninyos de la primaria estan vaziando las klasas, saliendo, korriendo, bolando a kaza. Tambien, el bruido de los karros ke vienen a arrekojer algunos de los ninyos se pueden oyir, kuando todos estos movimentos en la kaye se enkontran en un embrolyo del trafiko.
Asentada en el minder, una seria de imajes me aparesieron. Yo esto akostumbrada a eyos, ke siempre yegan kuando akontesimientos importantes estan a punto de afitar. Durante un tiempo, yo no entendia klaramente lo ke sinyfikan estas viziones, kuando supito viya en frente de mi, aparasimentos de djente ke enkontri en mi vida i sus karas.
Apoyando su kavesika sovre mis piernas, veyo al lado de mi sovre el minder, mi inyeta, ke arrekoji agora de su eskola. Entonses viene en mi tino una retirada a las dias de mi propria eskola, mi mansevez en un otro pais. Penso ke biviyamos una vida diferente de esta de la mueva djenerasion de oy, sin tener los luksos i las rikezas de agora….
Ma tengo todos mis tiempos mesklados. En primer lugar me olvidi el nombre de mi eskola. Entonses me akodri ke era un edifisio enorme, kon muchos korredores, salas grandes i una ermoza eskalera a la entrada.
Apozi el brasiko de mi inyeta un poko mas leshos de mi, i despues de muevo otros imajes. Ansi pasaron dias de mi manseves, dias ensoleados ke nunkua van a tornar. Despues de la eskola keria viajar, keria ke me embien a Viena o Paris. I supito, yo veyo la data Septembre 1939 i me do kuento ke desde este momento, yo avia pasado a traves de periodos difisiles en mi vida, yenas de ansias, de tener sar, de tristesa i de los momentos desgrasiados de la guerra…. Sakudi esta memoria i despues otra data, Junio1941 aparese, kuando mi famiya i yo tuvimos de enfrentar algunos obstaklos muevos, en un otro pais leshano. Es sierto, la vida despues de la eskola no me trusho alegria, ma se izo muy dura para mi. Entonses!!!!, sovrebivi…. una grande parte del siglo XX. Algunos kapitolos me konfuzan, pero rekuerdo todo lo ke nesesito. Despues vine a bivir en un otro pais ande enkontri a mi amor, mi kerido espozo.
Serro los ojos i de pronto los rekuerdos dolorozos de la Guerra de Yom Kipur en Israel empesan a aogarme. Fue una trajedia de piedrer a mi ijo major, ke kayo en esta gerra kuando la armada muestra kruzo el Kanal de Suez. Lagrimas, i mas lagrimas, fina oy.
Kualo tengo agora en frente de mi. En unos kuantos dias vo fiestar mi 90 aniversario, una vida de muchas largrimas i pokas rizas. En vezes bivo kon rekuerdos ke estan en un kantoniko de mi memoria i salen afuera, se meten en pies. La vida es komo una eskalera mekanika. Te yeva ariva, o abasho sin demandarte, sin azer kuento. Tambien se podria disfrutar de la vista i aprovechar de las oportunidades ke estan pasando. Al kontrario, puedia ser demaziado tadre.
Ayer la alegria miya fue la invitasion de mi ijo de mandarme mi innyeto i de partir en su kompanya al estranjero, i despues de unirme a la famiya para una vijita de una semana a Nisa i la Cote d’Azur. Inolvidavle i no puedesh kreervos ke alegria un ijo puede dar a su vieja madre. En verdad kualo me prime solo un poko de amor, una palavra dulse, simpatia i rekonosimiento.
Serri los ojos para deskansarme un poko. Mi ijo, la luz de mi vida, me izo feliz.
Se sono a la puerta. En avriendola, veyo afuera un mesajero ke keriya entregarme un buketo de flores. Yo no keria akseptarlo por modo ke no savia ken los embiyo, pero el joven me amostro la kartika i kaji echo las flores en mis manos. Meldi la karta ke se limitava a dizir:
«Grasias».
En entrando al interior, entendi ke las flores fueron embiyadas del Komite de muestra fragua. Me kedi sorprendida i feliz. Komo se akodraron la djente ke tenia aniversario?
Meti las flores en un lugar agradavle en el sentro de la meza, i ansi gozi der la rika seleksion del buketo. Devo regrasiar muy presto el Presidente del komite de la Kaza.
Pokos dias despues, kuando oyi la soneria de la puerta, enkontri de muevo el mismo ombre joven, vestido kon pantalones jeans i una kamizeta blanka. Todo lo ke tenia de dizirme era ke izo un yero en trayendome las flores, ke en realidad estavan destinadas a una otro persona de mi edifisio.
Grasias pero no grasias.
Publikado «El Amaneser» no.71-Enero 2011
Rivka ABIRY / Haifa
