eSefarad Noticias del Mundo Sefaradi
Por Rivka Abiry
Rivka Abiry partaja kon mozos sus konsejas, Estos kuetizikos son kontados por Rivka kon la grasia ke ya mos tiene akostumbrados.
Konsierje
Pasando las puertas djiratorias del lejendario Ritz París Hotel, se puede deskrivir komo entrar en un mundo majiko. Desde su grande lobi se presenta el vestíbulo, la vista de la elegansia de los enkantadores bares, las boutiques luksuozamente atraktivas i las kamaretas enserkladas. Este sitio istóriko ajita la imajinasión de todos los ke lo vijitan.
En todo kavzo, en mi meoyo entro la idea de ser un dia una konsierje en un grande otel. Esta idea ke alevanto mi imajinasion, la yevi biva en mi alma desde mas de sesenta anyos.
Aki empesa mi kuento, ke yo konsidero komo una grande partida de mi vida. Por favor venga akompanyarme.
Komo mansevika, mi padre me paso el amor por la lektura. Yo pensava de devenir una eskrivana, pero la interpretasion i el senso de mis ideas nunka no se diskutaron, animaron o fueron interesantes para mi famiya. Ansi me kontenti de eskivir en sekreto en mi kamareta.
Mi edukasion eskolar en Varna (Bulgaria) paso normal, aunke kuando vine a la Bulgaria, no savia la lingua bulgara i fui forsada de trokar unas kuantas eskolas. Tomando esto en kuento, mi padre kon su insistensia, me inskrivio en las programas del sistemo jeneral eskolar asta ke termini la eskola segundaria. Sovre todo kero adjustar ke desde la edad de 12 anyos, yo fui mazaloza de viajar al ajeno kon mis parientes.
Tornando a mi „hobby„ me se enfinko el deseo de azer algo kreativo en mi vida. Para devenir una konsierje tambien me aferri a la palavra «La vida empesa a los vente anyos“ ke tambien se konvertió en mi mantra.
Devo adjustar ke en mi adolesensia esto fue mi suenyo. En el mesmo tiempo mi padre kería ensenyarme el komersio para pueder, más tadre, tomar en mis manos una empresa o ambezarme un semejante lavoro.
Kuando mis parientes me yevavan en sus viajes al ajeno, en jeneral, se rezervavan kamareta en uno de los oteles situados en el sentro de la sivdad. De esta manera yegi a konoser las kapitales de Rumania, Austria, Fransia, Ingletierra i Italia. Ademas komo mi madre puedia avlar diversas linguas estranjeras, serviendo komo traduktora para mi padre, kuando se enkontrava kon sus mushteris en los lobby de los oteles lokales, yo puedia observer la sekretaria resepsionista. Ansí sontrayi kon mi idea de ser un día una konsierje i ansi mi idea se konveirtió en una obsesión.
Mi primera eksperiensa fue ir paso a paso a través de las puertas djiratoras del lejendario Ritz París, .ke me enkanto durante oras.
Despues vijiti el Savoy de Londra, konosido komo uno de los famozos de Londra. El otel es uno de los más maraviyozos i rikos oteles, kon abitasiones elegantes i vistas panorámikas del embarkadero del Rio Támesis.
En la zona pedestrial del korasón de Budapest, vijiti el moderno Kempinski Hotel Corvinus, ke se topa a un kurto paseo del Danubio i de las prinsipales atraksiones de la sivdad. De mesmo kero mensionar el Inn Hotel en Roma, serka de la Piazza di Spagna i sus pasos i el Hotel Negresco en Niza, senyalado por su portieres vestidos komo el personal en el siglo 18, i el renomado otel de Viena, el «Bristol».
A este punto la Segunda Gerra Mundial izo un korte en mis suenyos, un areto. Ma despues, una mueva oportunidad yamó a mi puerta en 1973. Entonses yo pensi a la posibilidad, a la baza de mis estudios, de bushkar i de aferrar un lavoro komo konsierje en mi sivdad. Embiyi letras de solisitud por korreo a los tres oteles. Mis amigos me enkorajaron i tambien estavan seguros ke yo iva obtener el empiego dezeado.
Naturalmente mandar mis letras de aplikasion puedia avrir las puertas de mi dezeo i de mis proyektos muevos, pero a este tiempo mi planos fueron kortadas de un trajiko evenemento, la pérdida de mi ijo en la Gerra de Yom Kipur i la diversidad de las eksperiensas sigientes. Me di kuento ke fui ovligada de abandonar mis planos.
Al mismo tiempo, yo tenia un lavoro komo sekretaria. Luchando por la noche kontra el suenyo i la kanseria, yo no me deshi de mi determinasión. Kerido suenyo, no kije kompletamente alesharme de ti, solo keriya dar una buelta, trokarte un poko. Kería solamente asentarme durante unos días, en uno de los oteles de sinko estreyas, para observar de serka las funksiones de un konsierje, de oyir komo se alkansa este lavoro, por modo ke mis sesenta i sinko anyos estavan mirandome en la kara.
La parte la más interesante de esta istorya akontesio kuando mi ijo ke bive en el ajeno, desidio de selebrar su kumpleanyos kon su espoza i yo en Eilat (Israel). Ké sorpreza, ke oportunidad de konoser esta sivdad i el otel Dan Panorama. Ayi arivando i finalizando las formalidades de resivir muestras kamaretas, miri a mi rededor i observi la insignia ke el konsierje yevava a su uniforma.
Vide el nombre «Mizrahi», i vide la emblema de las yaves doradas metidas evidentemente sovre la alda. El nombre me intrigó porke la famiya de mi espozo fue una vez Mizrahi. Antes de resivir la yave de mi kamareta, le pregunti sovre su orijin. Rezulto ke Uri Mizrahi era un pariente leshos de mi espozo i ansi un miembro de muestra famiya. Antes de 60 anyos, su famiya vino a Eilat de Varna (Bulgaria) kon la aliya de los judíos búlgaros. En Eilat, en la segunda jenerasión, el eskalado en el lavoro komo konsierje.
Los dos tuvimos la gana de kontinuar muestras konversasiones durante los sinko días sigientes. Ansi mi kuento se estava aserkando a su final feliz, fue komo una eksplozión, una koza inkredivle.
Posteriormente konosi a su famiya, i durante muestras reuniones privadas, el me konto kualo se espera de una resepsionista. Uri me yevó a un tur del otel, me ekspliko las egsijensias administrativas de su lavoro, komo parvino a este lavoro, las preguntas i keshas de los klientes, vide el tapet korolado i oyi de su propria azlaha. Los dos puntos floshos de mi suenyo se arekojeron.
En supito, despues de muchos, muchos anyos, mi suenyo ekstraordinario, ke nunka no me abandono, afilu ke troko de vez en kuando, a la fin se realizo.
Enviado por Rivka ABIRY / Haifa
