eSefarad Noticias del Mundo Sefaradi
Por Rivka Abiry
Kada mes Rivka Abiry partaja kon mozos una de sus konsejas, Estos kuetizikos son kontados por Rivka kon la grasia ke ya mos tiene akostumbrados.
KON BODA I PANDERO
Era esta boda ke troko mi vida entera. Kuando vini a Israel, el kibutz era mi kaza. Aki me metieron en el kumash kon los pollos, las gaynas i los gayos. Bivia dia detras de dia entre ellos, kudiando los, ambesando me de amar los, i a mirar los komo una sosyeta de benadam, ver las luchas de los patrones i las gerras de los gayos. Mientres ke lavorava ayi, mirava para ariva al sielo i via pasharos bolandos. Asi ansina ke mi alma gritava para mas, aunke ke savia ke no puedo bolar. En este tiempo bivi kon mi imajinasion i me asimijava entrando en un otro mundo grasias a mi fantasia. Empesi entonses kon mis kuentos.
Despues del lavoro avia siertos haveres en el kibuts ke se arekojivan en el klub, alderedor de la meza para eskuchar a mis kuentos. Yo kontava un kuento i despues algun otro kontava demesmo sus rekuerdos. Me mankavan mis parientes i ansi deskarinandome sentia siempre ke mis eksperiensas i istorias de la chikes eran mi akdama de akontesiamentos alegres, interesantes i umoreskos. Todo lo ke kishe fue de enkontrar a mis eskuchadores a medio kamino, i englenear los..
Despues de mi servisio en al armada , kuando retorni en el kibutz, enkontri a Leon, ke era el veterinario del kibutz. Saliando del kibutz, mos aresentimos de bivir en el norte de Israel. Muestra manera de vida modesta kontinuo asegun lo era, muestras salidas i los ekspektivas eran de mesmo arreglados, ma la fortaleza de mi imajinasyon me acompaniava siempre, enjuntos kon el sentimiento del djugo de la fantasia, i de la maravia. Aunke ke me familiarsi kon la vida de la djente ke bivian en la sivdad, de vez en kuando siempre mi fantasia keria aserkarme mas de ellos malgrado ke estavan mas o menos leshos de mi, en un otro serklo.
Un dia el postachi mos trujo un kombite para una boda, en uno de los mas grandes i renomados oteles en Haifa. Se avlo ke esta boda seria supuesto la boda del anyo. La yamada vino de Dr. Axel, un amigo muy bueno del padre de Leon. El dia de la boda me alevanti la demanana, en el banio frio me lavi la kara, i me peini los kaveos unas kuantas vezes para trakilizarlos. Porke no tenia un vestido elegante apropriado, mi vezina me dio uno. Era largo, un poko strecho alrededor de mis ombros, las mangas eran kurtas, ma mi amiga adjusto todo. Eya me dio guantes blankos largos i un chapeo ke me enkanto. Los kalsados mios eran pasados de moda, i no los mijores para el vestido, ma mi amiga tomo demesmo kudio de esto. Los boyadeo. Leon, el mio, tuvo su ermoso vestido i todo el tiempo enkorashando me. El mesmo dia, la vezina me dio tambian un chadir, porke anunsaron ke la tadra va kayer luvya.
Yegando kon el taksi a la entrade del otel, se devia entrar par la puerta volvande, ande mi primera disgrasia ampeso. Afuera ampeso la luvya i yo avri el chadir . La puerta dio unos kuandos bueltas. Di karar de azer el primero paso para entrar. Finalmente entri. La puetra se aboltava, se aboltava, kontinuava sus bueltas, una vez i despues una otra vez, i yo dainda ariento no topando kolaylik komo salir. Kualo azer!!!! Me topi arodeando me enjunto kon la puerta fina ke Leon de la otra vanda me izo simanes komo salir. Kuando finalmente ya entri en la sala, un poko shashereada, un poko moshada, tenia dainda el chadir avierto en la una mano, i en la otra mano la chanta. Tambien mis kalsados boyadados desharon atras de mi un chiko choriko de kolor maron. Apenas entri en la sala, mareada de la hadra i del saltanat de las mesas, syegada de las grandes luzes, en el punto ke ya retiri los guantes para saludar a los parientes del hatan, me aresvali i me topi en basho sovre el tapete kolorado afilu mirando los kalsados de los musafires. Entremientes mi chanta, mis entoshos, mi chadir avierto, mi dos guantes, mi chanta se disparsieron i bolaron en diversos direksyones. Ke disgrasia, ke verguenza!!! Mi desmazalado Leon, mirando me, triste, ensoflamado. Un fotografchi mesmo izo un foto de este fiasko i yo sin solup me topi alevantada de 4 brasos. Era espantada, estemperada. Me yevaron i me asentaron en una siya. Alora oyi una dulse voz:
“Oppala!!!! Ke mal mos tengas kerida Rebecca. Ke fue kon ti?. Me aze pena de verte en este hal”.
Devista me abolti par ver la persona ke me ayudo. Entonses vide a Yaakov, uno de mis mijores haverim, ke vino kon mi en la mesma alya, ke estuvo en el mismo kibutz kon mi, uno de mis sivdaderos, ke lo yamavamos “El filosof”, el “Hariv”, i ke mos espartimos antes de 15 anyos kuando el partio a la Australia. La unika persona ke usava mi nombre “Rebecca”. En este momento me echi en sus brasos, chupos i bezos. Leon mirando me i pensando:” Oy siguro mi mujer lo fuyo”.
Es a vosotros de djusgar kualo fui la fin de esta istoria.
Rivka ABIRY / Haifa
