eSefarad Noticias del Mundo Sefaradi
Por Rivka Abiry
Una semana despues de la operasión, el mediko mio kerya ver si todo reusho. La vijita, según mi no era nesesarya pormodo ke yo sentia ke fue una azlaha grande i ke komo seguita me se avrieron agora los ojos. Todo ke fina agora era coverto kon una nuve gris, yo pudia agora ver subito mas klaro, mas parlak i mas empozando. El mavi agora se izo mavi, el penbe penbe, i el violet, violet. Ansi alegra de este trokamiento, no me apresti, i en este hal estuve pasiente en esperando en la klinika, ke yamen el numero uno, ke resivi para entrar ande el mediko. Tambien kale kontar vos ke en esta kamareta vide una mujer jovena, vestita “en quarter epingles” ke atiro mi atension., Lo ke me empresiono fueron sus kalzados kon altos talons. Ma esta persona, me paresia desreposada, se asentava al banko, se alevantava para ver si el mediko vino, asperava la entrada de una sierta persona, bushkava en la lista akolgada al lado de la puerta, el nombre de Moshe Arditti, echava ojo a la ora, era en estrechura. La vistamienta sua me plasio i de mi para me pensi ken se viste ansina, en su ermosura se atrive. “Ke ermosa i atraktiva mujer, kualo tiene???”
Apenas vinieron los medikos, me aresinti alado de la puerte. En este momento aparesio un donzel, kon una kara muy triste, el doblado en dos, tuviendo grande adjele. Estuvo muy eksitado. A punto ke aparesio el mediko miyo, no kisho verme, al kontraryo presto, presto dio kamino al ombre kon la kara triste i lo entro en su kamareta.. Despues no solo un mediko, ma unos kuantos medikos tomaron el kudio de el, i me desharon solika esperar afuera. Remarki ke mismo la dama troko solo unos kuantos palavras kon el ombre, ma se apresio de salir de la klinika en diziendole:” Vo retornar lo mas presto ke puedo”.
Kuando vide negras i no buenos, eskoshi de esperar. Entremientes los medikos, unos kuantos vezes, izieron al ombre entrar i salir de la kamareta , i el todo el tyempo soliko, kayadiko, kansado. De vezes le azivan hatir de asentar lo a mi lado en el banko. Vide su tristesa i el mirando me kon lagrimas en sus ojos. Tenia una kara preta, devia de ser hazino, o fue tomado de un espanto. No le salio una palavra de su boka. Se kedo mudo, i yo le deshi tyempo. A la fin tuve el animo de konsolar lo, ma non savia komo alevyanar sus dolores. Kerya enforteser su esperansa, en diziendole ke todo se va aklalar, se va areglar, ke el nesesitava solamente tyempo para ke las kosas se aresentan, ke devia ver todo en una otra luz. Tuve zahut de el. Le sueti hazak baruh. Finalmente el me disho:
”Guay de mi ke me kemi. Era tanto orozo, tan feliz anoche. Pensi ke para mi vino el tyempo de empesar una mueva vida, una vida areposada…..kuando subito sono el teléfono.”
Antes ke lo yevan afuera en una kama, se aserko de mi, me tomo la mano i me rengrasio para mis dulses palavras, de enkorajarlo, i para mis konsejos.
Este dia me paso la gana de ver el mediko, ke estuve muy emosionada.. Lo ize el seguinte dia, kuando le demande a mi doctor kualo akontensio kon el mansevo. Me disho “ Kaji nada. Era un chiko yero de la komputadora, ke mesklo dos persons kon la mesma alkynua i eskosho a la persona inkorekta. Kosas ke mos afitan oy en la vida muestra, grasias a la muestra moderna teknolojia.”
Ama kualo kon el mansevo???
Kuando el telefon sono, se le tomo el tino, kuando le ovligador de venir a la klinika por una urgenta eksamination, poveritiko le arevataron la fiel , se espanto i yoro, porke la mesma noche antes de este evenimento el proposo a su enamorada Lea de kasar la, de fraguar una kasa i de azer kon eya un largo viaje.
El dio ke mos guarde de semejantes yeros teknikos.!!!!!
Unos kuantos dias despues tuve la surpreza de resivir un karta kombitando me al kazamiento de Sg.Moshe Arditi kon Lea Farchi.
Publikado en «El Amaneser»
