eSefarad Noticias del Mundo Sefaradi
Por Rivka Aviry
Un dia mi papa en metiendo el pie en kasa mos trusho un musafir ke no era konosido en muestra malle. Desdel prinsipio mi papa kedo muy kontente de este muevo musafir i muy presto lo kombido a bivir en muestra famiya.
El fue akseptado por todos, i izo parte de muestra vida. De esta momento endelantre el fue komo un miembro de la famiya.
Engrandesiendome, nunka demandi kual es su lugar al seno de la famiya. En mi alma el tenia un kantoniko espesial. Mis djenitores fueron mis instruktores.
Mi mama me ensensyava komo apartar entre lo bueno i lo malo, i mi papa a ovedeser. Ma el musafir… el era muestro kontador. Kuando kontava konsejas, me tresalia. Lo eskuchava i tenia grande plazer de estar en su kompania. Tenia boka dulse, un saver avlar i una imajinasion biva ke lo azian muy dezeado. De esta manera el me okupava largas oras.
Si yo keria saver alguna koza sovre la vida, la istoria o la sensia , el savia darme las repuestas sovre el pasado, entendia el prezente i a vezes eskudyava el futuro. El akompanyo mi famiya en Fiestas de Independensia de Israel i a mi me yevo al teatro i al sinema. Me azia riyir kon tarakas ma me azia yorar tambien. El musafir nunka kedava de avlar, i a vezes azia enfansiar a mi papa asta ke lo azia durmir, ma el no le importava.
Kuando estavamos asentados en el salon mi mama se alevantava i se iva en su reynado, la kuzina, sin azer bruido, siendo ke mosotros kerimos bien oyir i entender lo ke mos estava kontando i ver lo ke iva akonteser. No se si eya arogo ke el musafer se vayga, ma no le dicho “siktir”.
Papa tenia en kaza siertas reglas i una filozofia a las kualas mos forsava de ovedeser – ma el musafir no se sintia ovligado de respektarlarlas. Por exemplo el uzo de una lengua basha i de palavras suzias no era permitido ni en muestra kaza ni ande muestros amigos i konosidos. Ma desde mucho tiempo, al musafir maestro se le arezvalavan palavras ke azian soflamar a mi papa, i traer estrechuras a mi mama. Ma el, no le azia ni frio ni kalor.
Mi papa mos avia defendido de bever alkool, o de fumar. Ma el musafir lo ofensava amostrandomos sin muchas hadras sigaros, tabatieras i pipas. El avlava “sanfason” de kestiones de sekso. Frekuetamente el era kontra de mis djenitores, ma por tanto nunka estava dispuesto a irse.
De esto pasaron munchos anyos i este musafir dainda bive kon mozotros,
porke mos es simpatiko segun lo fue del momento ke metio el pie i entro a muestra kaza. Si entras a la kamareta de mi papa, lo veras asentado en su kanton, asperando la persona ke el dezea oyir avlar.
El nombre ke dimos a este ekstranjero es “La Television”. Agora tiene una mujer– la Komputadora.
