eSefarad Noticias del Mundo Sefaradi
Mi kunyado (Yosef) Djuzepo suvio a Israel de Salonika, via tierra, sin vapor, solo kon otomobiles i trenos. El pasaje era de Liban a Israel, onde se unio kon sus parientes ke vinieron antes kon la taifa, para lavorar en el porto de Haifa. Yosef ambezo en Salonika a la eskola i savia Grego i Ladino fluentemente. En Israel lavoro poko tiempo al porto, despues zarzavachi, i lo mas de anyos era pepitero.
Vendia pepitas de karpus i de melon, turnesol i kalavasa. Torrava kirikikes, kon kashka, o mundados, i naturales. Tenia un orno de kuatro kavras, para torrar el kashyo, almendras, alviyanas, fustuk halabi, muez, pekanes, bilibiz (garvanso) i mas.
Vendia tambien fruta seka, komo figos, datles, prunas, pasikas, kaysi, i mas. Todo importado de la Turkia en kashikas de tavlas blankas. La ganansia no era sufiziente, ama kumida no mankava.
Yosef i mi ermana estavan en una parea de sinko kuples de amigos i una mujer, bivda. Esta parea de amigos se enkontravan kada ves en otra kaza, para partiseptar el djugo de kartas, remi las mujeres, i poker los ombres. Aparte del djugo, naturalmente, la kumida ke aprontava la balabaya, la ostes. Los djugos eran kon poko paras, seryosos, i rapidos. Los sujetos ke avlavan eran livyanos, para pasar la ora.
La onor de la balabaya era la rikeza de las kumidas en la meza. De ver las kolores i la variedad, te venia la gana de komer i bever la redoma de Raki, ke ya estava pronto kon los kopikos espesial de kristal, ke saliyan de la vitrina en esta okasion.
Se puedia ver en la meza, las kozas las mas savrozas komo peshkado salado, kon tajos de sevoia korolada, revanadas de sujuk i abutaraho, o lakierda de palamida, tarama, i pastrama. Las salatikas de mil kolores, i pastos. salata vedre, o de safanoria, pandjar, lahna i alichuha (hasa), kulopidia, (karnabit) blanka komo la nieve, i mas.
Despues de la kumida venia el deser: tajos de marsapan, maruchinikos de almendra o de kokuz, biskochikos kon dulse de kolores, i siguramente, la tavla i el kopo yeno de agua para meter las kucharikas empleadas. I a la fin las pepitas, fustukes, muezes almendras i el kave preto. En vezes serviyan kastanyas buyidas, para ke sea livyano a mundarlas.
Estos enkontros eran tal emportantes para la sanedad de la alma, espesialmente en la edad avansada, el avlar i el pensar mos da su provecho al meoyo de la persona.
Los partisipientes de los enkontros ya desharon la vida buena, i lo ke mos kedo son los rekordos dulses de esta epoka.
Sanos i rezios todos i kon amista.
Nissim Ashkenazi
Kiryat Motskin
Israel.
Fuente: Nissim Ashkenazi/Ladinokomunita
