eSefarad Noticias del Mundo Sefaradi
El paiz de israel se establisio en el anyo 1948. los Inglezes del mandato salieron, i el paiz empeso a estar independiente, yeno kon mil i una kulturas, linguas, kumidas, vistimientas i uzos de los judyos ke vinieron de todas las partes del mundo. No era livyano, el paiz se izo komo una eskola grande, ambezar i edyukar, para tener el poder de estar aunados, malgrado las diferensias, i las difikultades de kada diya.
Los elevos en las eskolas, kon el tiempo, eramos organisados en grupos komo Tsofim (boy scout) Mahanot haolim, Hashomer hatsair, Hatnua hameuhedet, Hanoar haoved, i mas. En estos grupos mos ambezimos muchos sujetos, kantimos, paseimos, avlimos i baylimos, i mos engradesimos en un kamino israeliano igual para todos, i aminorar las diferensias.
Haifa esta fraguada en la muntania Karmel, asta el golfo de Haifa kon el porto. Haifa i el derredor son muy ermozos, siempre vedre kon arvoleriyas, flores i plantas.
Las kazas de las aktividades de los grupos, eran sityuadas en la muntanya, londje de muestras kazas i bastante kamino a pie de ir i venir. Teniyamos un uzo falso en atornando, arankar muchas flores para traer a kaza, arankimos Hamapulas (wind flower), Siklamenas (primroses) en vezes Narsizos (daffobils) i otros. Klaramente, ke en arivando en muestras kazas, las flores ya estavan amurchadas i esmayadas, sin ermosura, i rapidamente se topavan a la kuva de estyerko…
Tomo tiempo a ambezar a los ijikos i al puevlo entero ke es defendido de arankar flores o otras plantas, i kitaron ordenes ke las flores i las plantas son protejadas i ke son la ermosura de la natura, i es defendido de arankar. (afilu ay djeza) fizieron muchas aktivedades para eliminar el uzo de arankar, salieron kantes, lisiones, konferasias i mas.
Tomo tiempo, ama reusheron. Oy en dia el puevlo i los ijikos se komportan kon disiplina sivil de no tokar a las flores i las plantas. La maravia es ke se ve deredores largos yenos de flores kon kolores i golores ekstraordinarios, salen la djente a ver las flores sin tokar i sin arankar i kon plazer grande.
Nissim Ashkenazi
Kiryat Motskin
Israel.
Fuente: Nissim Ashkenazi/Ladinokomunita
