eSefarad Noticias del Mundo Sefaradi
Una vez, los ratones izieron una reunion para dechidar de un plano para eskabuyirsen de sus enemigo, el Gato. A lo manko kerian topar alguna manera de saver kuando el va venir para ke tengan tiempo para fuirsen. En efekto tenian ke azer alguna koza, porke estavan biviendo en espanto konstante de sus penchés i por esto no tenian ozadia de salir de sus nidos ni dia i ni noche.
Se diskutieron munchos planos, ama dinguno de eyos se konsidero bastante bueno. En fin, se alevanto un raton muy manseviko i disho: «Tengo un plano ke parese muy simple, ama se ke va reushir.»
La sola koza ke devemos azer es enkolgar una kampana al derredor del garon del gato. Kuando sintimos sonar la kampana, vamos a saver inmediatamente ke muestro enemigo esta viniendo.
Todos los ratones se sorprendieron muncho ke no avian pensado en un plano semejante antes. Ama kuando se estavan alegrando de sus buen mazal, un raton aedado se alevanto i disho: «Dire ke el plano del ratoniko es muy bueno. Ama deshadme azer una demanda. Ken va meter la kampana al gato?»
Dizir lo ke se deve azer es una koza, ama azerla es koza muy diferente.Una Rapoza, ke estava fuíendo kon el resto de las hayas, se aretó kuando sintió al rebuzno del Azno. En aserkándose al Azno, disho kon riza: “Si te mantuvieras kayado, me avrías espantado i a mí. Ama te dates a mano kon tu rebuzno bovo.”
Azno kayado por savio kontado.
Partajado por Aaron Shapiro, Washington, DC
Traduksión echa por Roger Brewer, USA, i Renee Martín, Gales / UK
Fuente: Ladinokomunita
