eSefarad Noticias del Mundo Sefaradi
05.06.2026
Dos Kavras, djugando kon alegría en los tepes (kolinas) piedrozos de un vaye montanyozo, se toparon una en kada lado de un burako en la montanya en ke pasava un río.
El tronko de un arvolé kaído servía de kuprí (ponte) sovre el burako, i en este kuprí, mezmo dos sindjapes no kavían endjuntos. Este kamino era tan estrecho ke mezmo un barragán se iva a titirear del espanto por toparse en él. Ama no estas Kavretas. Sus orgolio no les permetía asperar a la otra a ke pasara en primero.
Una metió el pie sovre el tronko. La otra izo la mezma koza. En medio se toparon kuerno kon kuerno. Dinguna no deshó pasar a la otra, i de este modo las dos kayeron, i se arrastaron en la korriente de las aguas.
Es mijor deshar pasar, al lugar de kavzar una desgrasia kon el inat.
Trezladada por Aaron Shapiro de Georgia, USA i Roz Kohen de St. Louis, USA
Arriftada por Miriam Sherman de San Diego, USA
Fuente: Ladinokomunita
