eSefarad Noticias del Mundo Sefaradi
Una Rapoza se kayo adyentro de un pozo, i afilu ke no era muy ondo, se apersivyo ke no puedia salir afuera.
Dospues de aver estado en el pozo muncho tiempo, vino por aya una Kavra kon muncha sed.
La Kavra penso ke La Rapoza avia abashado para bever, i por esto le demando si la agua era buena.
«La mijor de todo el pais,» disho la Rapoza ramaya, «salta adyentro i aprovala. Ay mas ke bastante para mozotras dos.»
La Kavra ke tenia sed pishin salto adyentro i empeso a bever. Kon la mizma rapidez, la Rapoza se suvyo ensima de la espalda de la Kavra i salto de las puntas de los kuernos de la Kavra afuera del pozo.
La Kavra bova alora vido en ke apreto se avia metido i arogo a la Rapoza ke la ayudara a salir.
Ama la Rapoza ya estava en kamino para la shara.
«Si tuvieras tanto meoyo komo barva, viejo amigo», le disho en korriendo, «uvieras echado tino en la manera de salir, antes de saltar adyentro.»
Mirad bueno antes de saltar.
Trezladado por
Renée Martin, Cardiff, Wales, UK
Roger Brewer, Portland Oregon, US
Fuente: Ladinokomunita
