eSefarad Noticias del Mundo Sefaradi
18.04.2026
Un Taushán [1] salió de su kaza un día para topar una buena sena de trévol. Ama se olvidó de serrar la puerta kon yave i kuando estava afuera una Komadreja entró i se arresentó komo si fuera su kaza. Kuando el Taushán aboltó, ayí estava la Komadreja kon su naris aparesiendo por la puerta, sorviendo [2] el aíre.
El Taushán se arravió muy muncho–por ser una kriansa ke no se uza arraviar–i rogó a la Komadreja ke se fuera de ayí. Ama la Komadreja estava muy kontente ande estava, i no kijo menearse del lugar.
Un Gato viejo i savio sintió el pleto i les ofresió resolver la diskusión.
“Aserkavos de mí,” disho el Gato, “yo só muy sodro. Aserkad vuestras bokas a mis oidos para dezirme los detalyos.”
Los dos inyorantes izieron lo ke el Gato les disho i pishín el Gato los avía apanyado kon sus penchés [3]. Siguro, no avía de enyegar ke el pleto se avía solusionado.
Los fuertes uzan resolver los pletos asegún su propio provecho.
*****
[1] Conejo
[2] Olfateando
[3] Garras
*****
Traduizida por
Aaron Shapiro, Washington, DC
Roz Kohen, St. Louis, MO
Fuente: Ladinokomunita
