eSefarad Noticias del Mundo Sefaradi
Un chifchí viejo i riko, ke ya savía ke le mankava poko para la fin de su vida, yamó a sus ijos al derredor su kama.
“Ijos míos,” les disho, “Kale ke agash atansyion a lo ke va dizir. Por dinguna razón no pensesh de vender ni un pedasiko de muestra tierra, ke mos apertenía durante munchas jenerasiones. En algún lugar de muestra tierra, fue enterrado un tresoro grande.”
No vos sé dezir egzaktamente ánde, ama en algún lugar está, i siguro ke lo vash a topar. Kale ke kavakesh i ensembresh la tierra de un kanton al otro para konoserla bien.”
Apunto el padre les deshó la buena vida, los ijos se metieron a ensembrar, kitándosen la alma para no deshar dingún sentímetro de la tierra sin tokar, mezmo dos o tres vezes.
No toparon oro enterrado; ama kuando yegó la rekolta i izieron los kuentos, vieron ke tuvieron una muy grande ganansía, muncho más grande ke los vezinos, i ansina ya entendieron la lisión ke les kería dar suz padre, ke más les valía lavorar duro ke kualker tresoro ke pudieran topar.
El lavoro en si es un tresoro.
****
Esperamos ke vos ayga agradado la konseja.
Sanos i rezios ke estesh,
Roz de St. Louis, Michael de NY i Aaron de DC
Fuente: Ladinokomunita
