eSefarad Noticias del Mundo Sefaradi
Un Azno topó la samarra de un león deshado en la shara por un kasador. Se la vistió i se engleneava en eskondiéndose entre los arbustos, i saltando a espantar a las otras hayas kuando pasavan. Todos se echaron a korrer kuando lo veían saltar.
El Azno se tresalía tanto de ver a las otras hayas tomar la fuída, komo si él fuera un león de verdad, i no se podía kontener i deshó asoltar un rebuzno* ronko.
Una Rapoza, ke estava fuíendo kon el resto de las hayas, se aretó kuando sintió al rebuzno del Azno. En aserkándose al Azno, disho kon riza: “Si te mantuvieras kayado, me avrías espantado i a mí. Ama te dates a mano kon tu rebuzno bovo.”
Azno kayado por savio kontado.
Traduizida por Aaron Shapiro de Washington, DC
Redaktada por Roz Kohen de St. Louis, MO
Fuente: Ladinokomunita
