eSefarad Noticias del Mundo Sefaradi
Kuentikos de la Tia de Sulucha*
-Sulucha, tengo haberes buenos para ti. Ya topi ofisyo, i de agora adelantre va lavorar.
-Tia, a tu edad se lavora? Ya vaz a tener 90 anyos!
-Deke no? Tu marido i tu estaj lazrando i penando todo el dia. Parese ke los Inglezes biven para lavorar. En Estambol es todo a la roves: lavoramos para bivir. Agora yo me va azer Ingleza.
-Komo keres tu, tia. Ke ofisyo topates?
–Mira te dizere hanuma: aki los turistos pagan paras para ver kozas viejas. Mas vieja de mi, no van a topar. Ya se dize ke yo so una antika. Kada dia me va ir al musee, i me va asentar aya para ke la djente venga a verme. I si keren avlar kon mi, la lingua ke avlo yo tiene mas de 500 anyos. Ke dizes de mi idea para ganar paras?
-Ya esta maraviya!
Renée Martin
Payis de Gales (Gran Bretanya)
—————————————
*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
