eSefarad Noticias del Mundo Sefaradi
Ver más kuentikos de la Tia de Sulucha >>
-Sulucha, parese ke topi un virus muevo.
-En ora buena, tiya, ¿ke te afitó? ¿estas hazina?
-No, bendicho el Dio, ya esto buena. Ven hanuma, te eksplikare. En primero avyan los viruses de los doktores.Kuando te azyas hazina, si el doktor no era kapachi de entender lo ke teniyas, te diziya ke tenias un virus i te dava un antibyotiko. Ansina te se asemejava ke era un ombre muy savido.
-¿I kual es este virus muevo?
-Pasensya, hanuma, no me kortes la palavra. Dospues de los viruses de los doktores vinyeron los viruses de las komputadoras. I para esto toparon lojisyeles ke matan los viruses.
-¿I agora?
-Agora vino un virus muevo , ke mos va matar la lingua muestra. Se yama el virus del espanyol moderno. Kada vez ke los muestros viajan a Espanya, se ambezan la lingua de los Espanyoles i se meten a avlar i eskrivir komo eyos. estan tomando yampish muy negro.
-¡Guay ke mos vino! Para este virus no ay ni antibyotikos ni lojisyeles antivirus.
Renée Martin
Payis de Gales (Gran Bretanya)
La Lettre Sepharade 39 – Sept 2001
—————————————
*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
