La tia de Sulucha i los trenos inglezes por Renée Martin

Ver más kuentikos de la Tia de Sulucha >>

-Tia, ¿ande estuvites oy dia entero?

-Oy ize ida i vinida a Londra en treno. Una koza me paresio muy kurioza. El treno estava yeno de djente i todos estavan avlando.

-¿I deke ke no avlen? Si boka tienen, es para avlar.

– Hanuma, al tiempo no era ansina en este payis. Kuando yo vine vente anyos antes, los trenos yine estavan yenos, ama todos tenian la boka serrada. Kada uno i uno meldava su gazeta o su livro kon kayades.

-Ya tienes razon tia. Aki solo los ajenos avlan los unos kon los otros.

-Kuando me asenti en el treno me rendi kuento de lo ke estava afitando. Todos estavan avlando kon sus telefones de aldikera. No estavan avlando kon sus vizinos, ¡estavan avlando de si para si!

-Ya tienes razon tia. Los inglezes no trokaron, solo troko la teknolojia.

Renée Martin
Payis de Gales (Gran Bretanya)
La Lettre Sepharade 37 – Desembre 2001

—————————————

*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.