eSefarad Noticias del Mundo Sefaradi
Ver más kuentikos de la Tia de Sulucha >>
-Sulucha, ya me alegri ke se arrekayentó el aver i ke puedemos salir a kaminar. Se espajaron las nuves i salyo el sol. De tura ke seya!
Oy es Alhad, i no tengo lavoro. Ayde, tia, aprontate, i vamos al park endjuntos. Ya apareji un piknik de chuparse los dedos. Tengo bulemikas de kezo, prasifuchi, keziko blanko, pipinikos, domates, buletes de pirishil i boyikos de pimienta ke djusto agora kiti del orno.
-Vamos a piye, ke tengo ganas de kaminar. El park no esta muy leshos. I si vemos Mr. Williams kon su perro Porky, le damos un gostijo, para ke sepa la savor de la komida muestra.
Si, i kaminando vemos guertas, arvoles i flores.
-Mira ke ermozura; ay una mezika al lado del lago. Si mos asentamos aya, vemos de una parte las barkas, los patos i los pasharos, i de la otra parte, la djente, los perrikos i la vedrura
Ya parese ke estamos en Ganeden. Te trushe la gazeta para ke meldes los dedikodus gallezes [1]
-Todo bueno ke tengas! Esta tan ermozo, ke me kero kedar aki dia entero. Ama, estas oyendo un bruido?
Ke bruido, tia?
-Estas viendo esta meza yena de ombres? Vino una kreatura yorando i se echo en los brasos de su padre.
Atyo, razon tienes. Parese ke el ijiko se kayo embasho: tiene sangre en los dizes, i el pantalon esta arazgado.
-Agora esta viniendo una ijika kon la kara preta de dondurma de shokola. No solo se le embatako la kara, i el fostaniko blanko se le izo marron!
Tia, echaremos un oido para saver lo ke dizen los padres.
-Sulucha, de kualo estan avlando?
Estan diskutiendo de los rezultados del match de rugby.
–I deke no se okupan de las kriaturas? Ya me vinieron soflamas: otro ijiko se kayo a l’agua i esta echando chiyos porke no save nadar. Neyse, parese ke este ijiko grandiziko lo esta metiendo en sus ombros para salvarlo. Deke no se menean los padres?
Parese ke no tyenen la entisyon de bozdearse el istif: agora estan avlando de crikett!
-Komo de padres son estos?
Te eksplikare, tia: estos padres vinyeron aki el dia de alhad para amostrar a la djente ke son padres buenos, i ke saven okuparse de sus ijos.
-Son kandelikas de la plasa!!! I el paseo muestro mo lo izieorn sehora!
Mira tia, sigun las estadistikas de la Gran Bretanya, el 20% de famiyas kon ijos de manko de 16 anyos son famiyas sin padre. Las madres se okupan de sus ijos, i los padres los ven kuando pueden. Komo keres ke estos padres se ambezen a engrandeser ijos?
-Ya entendi, Sulucha, estos son los padres del fin de semana!!!
[1] Del Pays de Galles
—————————————————-
La Lettre Sepharade 54 – Jun. 2005
—————————————————-
Renée Martin
Payis de Gales (Gran Bretanya)
—————————————
La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
