La tia de Sulucha i las famiyas modernas por Renée Martin

Kuentikos de la Tia de Sulucha*

-Sulucha, tu vizina tiene 2 ijikos, ama  es kuriozo ke no se asemejan ni al padre ni a la madre.

-Si tia, el primero es del marido, i el sigundo es de la mujer. Agora van a tener otra kreatura endjuntos

– Ke maraviya, kada ijo vino de otra boda. Bueno, ¿ande estan las famiyas normales, kon ijos del mizmo padre i madre?

-Ya parese ke no kedaron famiyas normales. Agora la djente se kaza i se kita kada punto i ora.

-Ya entendí deke lo azen. Es bueno para la ekonomia. ¿Sino komo van a ganar los avokatos, los kurtyes i los hahamikos?

Renée Martin
Payis de Gales (Gran Bretanya)
La Lettre Sepharade 38 – Juin 2001

—————————————

*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.