eSefarad Noticias del Mundo Sefaradi
Ver más kuentikos de la Tia de Sulucha>>
-Sulucha, la vida moderna es una vida muy kolay i barata.
-¿En ora buena, tia, dande kitates esto?
-Avre los ojos, ijika. Agora kuando keres mandar una letra a una amiga, la eskrives en la komputadora i la amiga la aresive pishin, i sin pagar un grosh. Al tyenpo en Estambol, kalia merkar papel, pluma i pules, i dar un bahshish al postaji para ke te yevara una letra solo de Hasköy a Balat, i no a la otra vanda del mundo.
-¿Ansina aziyaj al tyempo? ¿I mas kualo aziyaj?
-La mosa Sarula, ke este en ganeden, lavava i fregava dia i noche sin kedar. La povereta, se le auflavan las manos de tanto lavar. Agora tenej una makina para lavar, i otra para fregar. No tenej menester de pagar una mosa. Para la uerta teniamos el bahchavan Mehmet Efendi ke mos kostava una fortuna. Agora tenej makinas para kortar la yerva.
-Tia, lo ke dizes ya esta djusto, ama agora ke tenemos tantos kolaylikes para azer los echos de kaza, no estamos aziendo egzersisyos i mos estamos engodrando. En lugar de gastar la pará en mosas i bahchavanes, estamos gastando la pará en kalsados i vistidos de jimnastik i en makinikas de egzersisyos.
-Kualo ke vos diga, ijika, ¡el Dyo ke vos de meoyo!
Renée Martin
Payis de Gales (Gran Bretanya)
La Lettre Sepharade 39 – Sept. 2001
—————————————
*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
