eSefarad Noticias del Mundo Sefaradi
Ver más kuentikos de la Tia de Sulucha >>
-Hanuma, ande estas koryendo? No te va kedar suluk! Asentate un puntiko para partir palavra.
Tia, oy tengo munchos ke azeres, kale ke me fuyga pishin.
-Peki, ya no estas lavorando dia entero? Mas kualo tyenes ke azer?
Todo lo ke me plaze azer, i ke no tengo tyempo de azer entre ‘l dia, porke devo ir al echo.
-Aman, aman, te estas akosando muncho, tomates yampish muy negro!
Emprimero va ir a nadar. Dospues va ir al echo. A midi tengo randevu kon el doktor. Dospues del echo tengo una reunion de komite.
-Peki, a lo manko el fin de semana te vas arepozar?
Tia, parese ke no m’entendites. Los fines de semanason para azer todas las kozas ke no tienes tyempo dew azer entre semana: lavar, utuledear, alimpyar la kaza, tomar polvos, merkar komida, ver famiya i amigos, meldar gazetas i livros, eskrivir letras elektronikas etc.
-Parese ke ‘lmundo evropeo se izo altust, esta de arriva abasho. De una parte ay los ke penan i lazdran toda la vida, i de otra ay los ke no azen nada i asperan la sedaka del mundo.
Este modo es el mundo moderno.
-En mi tyempo, la vida no era ansina. Las mujeres se kedavan en kaza para engrandeser ijos. Teniyan una vida mas repozada. Kada dia de la semana azian otro echo. Avia un dia para lavar; otro dia para utuledear; otros dia para ir al hamam kon amigas , etc. El viernes era dia de gizado grande: se gizava por dos dias para no lavorar Shabad. Kuando s’eskapavan los echos de kaza, las vizinas i sus ijikos se arekojian en los kortijos para bever un kaviko, kuzir, bodrar i azer dedikodu. Los ijikos djuavan ahuera sin espanto. Dingunosno se los arrevatavan.
Te olvidates ke en akeyos tyempos las mujeres moravan kon las suegras ke les davan mala vida.
-Ya tyenes razon, ama a lo manko, las suegras miravan los inyetos i se okupavan de la kaza. Las suegras ambezavan a azer borrekas, bulemas, boyikos, preasifuchis i bimuelos. Sin las suegras, ya uvyeramos pedrido todas las tradisyones.
Bueno tia, kualo keres ke aga agora?Ke deshe el echo? Estamos en otro payis i en otros tyempos. Kale adaptarse a la vida moderna.
-Si, asi bivas tu. Kontinua ansina komo empesates, i a la vejez se avriran las puertas de tu prision, la ke tu yamas ofisyo, i tomaras dos groshes de pension. Akeyas oras te vas arepozar?
Tia, kuando me venga la ora del repozo, parese ke ya va estar debasho de tyerra.
—————————————————-
La Lettre Sepharade 51 – Sept. 2004
—————————————————-
Renée Martin
Payis de Gales (Gran Bretanya)
—————————————
La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
