eSefarad Noticias del Mundo Sefaradi
Ver más kuentikos de la Tia de Sulucha >>
-Sulucha, los inglezes tyenen el tino en una koza sola: Noel. Penan i lazdran anyo entero para ekonomizar dos groshes, i dospues, se lo gastan todo enduna kuando vyene Noel.
Si, tia, este es el uzo de este payis. I no solo el uzo de los kristyanos. Mira, en el salon de los koanim ay un arvole de Noel.
-Atyo, ke me muera yo, ¿trokaron de relijion?.
No, tia, merkan un pino i dizen ke es para Hanuka.
-Ya me apersivi ke los Goldstein komyeron indyana el 25 de desembre.
I eyos dizen ke es Indyana de Hanuka. I los Brucker te trusheron un regalo ermozo de Noel.
No es de Noel, tia, es de Hanuka. I si tu no les das regalo, se aravyan. De una parte dizen ke son djudyos i ke no kreen en Noel , i de otra parte se aravyan si no les mandas regalos i kartikas.
-Ayde, Sulucha, no tengas muncho daryaver kon esta djente, asi bivas tu. Ya parese ke estos djudyos se izyeron kristyanos. Para no averguensarse delantre de los amigos trokaron el nombre de Noel i lo yaman Hanuka. ¿A ken estan enganyando?
Tia, no te estrecheyes, se estan enganyando de si para si.
– – – – – – – – – – – – – – – – – –
Renée Martin
Payis de Gales (Gran Bretanya)
La Lettre Sepharade 41 – Mars 2002
—————————————
La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.
