La tia de Sulucha i el marido virtual por Renée Martin

Ver más kuentikos de la Tia de Sulucha >>

-Tia, la ija de Marikula ya topo novyo i se esta kazando.

-Ayde, mazaloza i venturoza ke seya. ¿Ande topo novyo? ¿Se fueron a la kazamentera?

-Si, se puede dizir ke se fueron ande la kazamentera virtual.

-¿Ke me estas diziendo, ijika? ¿Ke marafet muevo es esto?

-Mira, te amostrare. Asyendes el komputer, pizas a los botonikos, i topas una firma de kazamenteras. La firma te da la lista de los mansevikos ke estan bushkando novya.

-Sulucha, yo no entiendo estas kozas de komputers. Dizeme una koza: si se puede kazar kon marido virtual, ¿se pueden tener ijos virtuales tambien? ¡I demandale a tu komputer si puede kortar la fashadura de las kreaturas!.

Renée Martin
Payis de Gales (Gran Bretanya)
La Lettre Sepharade 38 – Juin 2001

—————————————

*La tia de Sulucha avla solo djudio. No save lo ke es ni el Ladino i ni el Judeo-Espanyol: estas palavras son para la jente enstruida, la ke save meldar i eskrivir. El padre de la tia era tan provetiko ke no pudo mandarla la eskola. Ama la tia era entelijente i se ambezo un poko de grego kon los vizinos de ariva, i un poko de ermenesko kon los vizinos de abasho.
Sulucha era el nombre de la mosa de mi nona. Eya se murio munchos anyos antes ke nasi yo. Kuando yo era ijika, me kontavan ke Sulucha tenia las manos aufladas de lavar i fregar todo el dia, la povereta. En akel tiempo no avia makinas de lavar.