eSefarad Noticias del Mundo Sefaradi
Omaje a Matilda Kohen Sarano el 13 de oktobre de 2012
Noche de alhad pasado, el sentro de los orijinarios de Turkia Arkadash en Yehud organizo una tadrada en onor de la poeta, muestra kolega Matilda Koen Sarano, en presensia del 5 en Presidente del Estado el Sr.Yitzhak Navon.
La tadrada fue dirijida por Kobi Zarco. El evenimiento fue avierto kon las palavras del presidente del Sentro Arkadash, Eyal Peretz, ke felisito a Matilda por su gran kontribusion a la kultura djudeo-espanyola i por su prontitud a ayudar al establisimiento del sitio de Internet del Sentro. Peretz le presento a Matilda un regalo simboliko: una makina de eskrivir , ovra de mano. El Sinken Presidente del Estado i Presidente de la Autoridad Nasionala del Ladino i su Kultura, el Sr. Navon, mensiono los esforsos ke Matilda aze para prezervar la kultura de ladino i le auguro de kontinuar en su kreasion literaria fertil. Se adjuntaron a los auguros tambien , el Mayor de Yehud el Sr. Yossi Ben David, el Presidente de la Asosiasion para la Kultura del Patrimonio Djudeo-espanyol, el Sr. Moni Moreno Armoza i el envestigador Yehuda Hatzvi.
La poeta Margalit Tovi, meldo una poezia muy emosionante ke kompozo espesialmente para esta okazion i konto sovre las aktividades de Matilda. La kantante, Ofri Eliz kanto «Ir Me Kero Madre a Yerushalayim», la sivdad onde mora Matilda i Gila Hasid kanto el kante: » La Kantiga de mi madre». El koro «Los Amigos» de Arkadash, en el kual azen parte 15 personas, kanto 3 kantes konosidos en ladino.
En la kontinuasion de la tadrada el Sr.Eli Matitiahu, organizador del Festiladino, entervisto Matilda. La Reyna del Ladino ekspliko: » El ladino para mi no es solamente una lengua, ma tambien una erensia! Erensia es, las poezias, las kantigas, los kuentos i las konsejas, los reflanes, las komidas i los dulses… todo lo ke sintimos i vimos en la kaza de muestros padres i de muestra famiya! Al prensipio» disho Matilda kon eksklamasion, me paresio ke devemos prezervar la lengua, ma despues entendi ke ay ke prezervar todo lo ke tenemos ariento de muestra alma, la kultura del ladino kon sus kantes i sus kuentos i kontinuar a desveloparla!»
Despues de la entervista, Matilda meldo dos de sus poezias i konto un kuento de Djoha.
180 personas partisiparon en esta tadrada, entre eyos: Roni Aranya, el Direktor Jeneral de la Kaza para aedados «Leon Recanati», la miembra de la Knesset Dr. Rachel Adato, i la Dr. Anat Lapidot, shefe enternasional de Ladino.
A la fin de la tadrada fueron servidos a los envitados, dulses i komidas kuzinadas del livro de Matilda «Gizar kon gozo».
Eskrivio:
Bertha Bar-Gil Saragosi
Yerushalayim, 2012
Eyal Peretz, Chairman
Arkadash – The Turkish Community in Israel
The Turkish Jewish Heritage Center
15, Tenenbaum St. Yehud ISRAEL
Tel. +972-3-5361666 Fax. +972-3-5360447
Visit our website: http://www.arkadas.org.il
