eSefarad Noticias del Mundo Sefaradi
Lunes 4 de novyembre 2013, delantre una djente de kaji 150 personas, en mayoriya djudeo-espanyolas, se tuvo en el Salon yamado Bertrand en la Mayoriya de Paris, le seremoniya de entrego de la medaya de vermeil de la Sivdad de Paris por Anne Hidalgo, Primera Ayudante del Mayor de Paris, al Profesor Emerito Haïm-Vidal Sephiha.
Munchas personalidades aviyan vinido asistir a esto. Al lado del Embashador de Espanya en Paris, el Sr Carlos Bastarreche Saguës i del Sr Jose Andres Gallegos, ministro consilyero de la embashada de Espanya, se puediya notar la prezensya del Sr Elad Ratson reprezentando el Embashador de Israël, del Sr Roger Cukierman, prezidente del Komitado Reprezentativo de las Institusyones Djudiyas de Fransya, de la Sra Marie-Christine Lemardeley, prezidente de la Universidad Paris 3 Sorbonne Nouvelle, i de los Sres Edmond Elalouf i Raphy Marciano, respektivamente prezidente i direktor del Sentro Komunitaryo de Paris, ansi ke de munchos elijidos de Paris.
En su diskorso del entrego de la prestijyoza medaya, Anne Hidalgo kijo en primero insistir sovre las sirkonstansyas de la seremoniya, avlando de «un momento muy partikolar». Ansi deklaro ser «esmovida i muy onrada de estar ayi para arresivir este grande profesor del kual la vida es una lisyon para munchos de entre mozotros».
De fakto la seremoniya fue muy amistoza afillu kedando protokolar. La Sra Hidalgo eksprimyo pishin su serkor kon los djudeo-espanyoles: «Entyendo todo kuando se avla en djudeo-espanyol, me syento, por esto tambyen, de los vuestros».
En su deskripsyon del kamino de vida del resipyendaryo nasido en 1923, «ke aze la onor i la grandeza de muestra sivdad», Anne Hidalgo avlo de su savidurya, de su deportasyon en Auschwitz, de la trajediya ke aharvo a su famiya i de su buelta, a la muerte de su madre en 1950, al estudyo del djudeo-espanyol, » un djesto profundamente esmovyente de omenaje a (sus) serkanos dezaparesidos, ama tambyen un djesto de kombate, para ke la erensya de esta lingua i de esta kultura, despues de la abominasyon de la Shoa, pueda sovrebivir, turar, i no undirse en el olvido».
La ovra konsideravle de Haïm-Vidal Sephiha amostra el fakto «ke el es la inkarnasyon misma de la kultura djudeo-espanyola, una kultura biva, el guardya de esta memorya». Este mesaje umanisto ke mos da es «para una parizyana nasida en Andaluziya una fuente poderoza de inspirasyon».
Para konkluir, Anne Hidalgo kijo insistir sovre kuanto le agradava ke Haïm-Vidal Sephiha tenga metido le byenvolensya en el korason de su penseryo.
En su repuesta, empesando por eksprimir «su grande mersi», Haïm-Vidal Sephiha empeso por siguro avlando de Paris i nombro el livro de Evelyne Lagardet «Un rêve français» para konfirmar ke los djudyos del Imperyo Osmanli, de Turkiya i del Maghreb yevavan un suenyo: «toparse aki, en el sentro de la Fransya, en Paris». Fue el kavzo de su padre yegado de Estambol en Paris en 1907 i su kazamyento en el kal dicho oryental en 1914 kaye Popincourt en el onzen arrondissement de la Sivdad.
Akodrando en kurto su pasado de dolor, se deviya de mensyonar «dos datas ke mos toman, mozotros djudyos i sovre todo djudeo-espanyoles, la una syendo la anagrama de la otra, o, mijor, el anaritmo: 1492
i 1942. Por la una, la ekspulsyon de Espanya, ama la sovrebivyensa de los djudeo-espanyoles, i por la otra, la solusyon final dechidada en Wannsee.»
Aboltando sovre la kuestyon de la lingua, era importante para el de akodrar ke «en kada lugar ande los djudyos bivyeron o fueron arresividos, tuvyeron la misma veluntad pedagojika de trasmeter la savidurya biblika i liturjika, por siguro por la lingua del pais». Ande los djudyos se instalaron, las varyas linguas tyenen ansina sus «konservatoryos» ke kontribuyen a la istorya de sus lingua. Esto es vedra para munchos paizes – en Fransya, kon las glozas de Rashi – i por siguro en Espanya. «La rikeza de muestra erensya es konsideravle, i puedemos dizir ke traemos atras oy a la Espanya todo lo ke konservimos. Ofresemos este tezoro linguistiko a la Espanya».
Enfin, adresandose a sus amigos muy numerozos, kijo rengrasyarlos kon muncha kalor, en akodrando ke por modo de la Shoa su konosensya de la lingua aviya sido kortada, ama ke, grasyas a eyos, pudo toparla de muevo. Ansina deklaro kon muncha emosyon: «Es vozotros ke mantuvitesh mi lingua i mis bushkedades.»
Eskapo kon una poeziya en djudeo-espanyol del Hahambashi de Estambol, Haïm Bejarano, muerto en 1931: «A ti lingua santa/ a ti te adoro,/mas ke toda la plata,/mas ke todo oro,// Tu sos la mas linda/ de todo lenguaje./A ti dan las siensias/ todo el ventaje./ Kon ti nos rogamos/ al Dio de la altura,/Patron del universo/i de la natura.// Si mi puevlo santo/ el fue kativado,/kon ti mi kerida/ el fue konsolado//”
Michel Azaria
Publikado en Newsletter Crif 7/11/2013 (http://tinyurl.com/p5ws7s7)
Trezladado por Edmond Cohen
