LA SAVOR DE PENSAR A LO KE BIVI… por Sal Amira: LOS ITALYANOS I LOS GREGOS JUDYOS DE COKAL

 

Livro miyo… En ti estamoz guadrando
la forma ke biviyamoz en Dardanels i
en laz sivdadikaz de la Marmara.

 

Kon el otomobil estamos abashando de un yokush -abashada- i vemos el puerto del kazaliko de COKAL. Este viejo puerto en un grande sirkulo i al kual e yega de una entrada estrecha fue konstruido en la antikuitad por la famiya DARDANOS

Esto vyendo ke en este sirkulo estan atados muy munchos veleros (sailboat, yelkenli) kon sus  propyos motores para pueder navigar en mares altas, si no ay ayre i lo mas de eyos kon dos DIREKES (Masts, postes, pilliers)

SENYOR DE LOZ MUNDOS, mersi por le ke me azes ver i konoser…

Esto tratando de ambezarme de lo ke esto vyendo. El 75 porsyento de los habitantes de este puerto son djudyos i todos konosen mi PAPU i YUSUF.

Munchos estan abrasando i bezando las manos de mi PAPU.

No uvo de avlar, los peshkados ya estavan dando umo en el BBQ. En la tavula/meza ya estava sirvido el RAKI, la sevoya biyen kortada, el pan istilo ITALYANO i las gazozes.

YUSEF mos konto ke los duenyos de estos barkos, yates ke estan fabrikados kon tanta delikadeza, son ITALYANOS i los fuyeron de las manos de MUSOLINI. Por seguro ke el governo fashisto se los iva tomar de eyos si kedavan en ITALIA.

Mos ensenyo las bandieras Italyanas ke viyamos atras de syertos yachtes. Mos disho tambien ke es el, el avokato de los duenyos de los yachtes, enkargado de loz seritifikados ke les pertenese.

A kontinuar…

 

SALAMON AMIRA
CHANAKKALELI kon OPTIMIZMO

Sal Amira
CHANAKKALELI, EN MIAMI USA.

 

 

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro