LA SAVOR DE PENSAR A LO KE BIVI… por Sal Amira: Los Barios de Bakirkoy fina Galata

Livriko miyo, en este kamino muevo en rumbo para Istanbul, me siyento muy triste. Si no es la alegriya ke va ver a mi madre i a mi padre estare yorando por oras.

Deshimos al onkli SABETAY en el ospital en buenas manos de medikos i la esperansa es ke el va retornar a su kaza en poko tyenpo.

Ya yegamos al kortijo de SIRKECI de ande salyo la famoza kansyon Sefaradi :

» Los kaminos de Sirkeci son yenos de arena
para pasar i retornar i verte a ti morena … »

Mi primo YUSEF paro el auto en frente de la parada de los trenos para amostrarmos estos vehikulos jiganteskos de serka.

DIO MIYO…KE MARAVIYAS… KOMO TUS KRIYATURAS TOPARON ESTOS SEKRETOS !

Estamos pasando el puente de GALATA ESTANBOL.

En la siedra esta la meskita YENI CAMI. una maraviya de edfisyo. ESTAMBOL es meskitas, minarets altas altas… El KAPALI CHARSHI,
el famozo merkado serrado esta serka de aki!

Entyendo mi tristeza vyendo miles de jente kaminando en las dos partes del KUPRI/PUENTE komo kodreros. Me espanta esto.

Ande kaminan esta jente? Ande van? Ke es lo ke azen? No yego a entender nada… Todo esta grande para mi…

Kuando vinimos a la mitad del puente miro a la derecha i me se achileya el korason vyendo estos ermozos vaporikos koryendo en la mar de
un lado al otro. Los umos ke echan de sus chimeneyas me akodran el vapuriko ke mos kito de Chanakkale.

YUSEF parese un dirijente de turistas. Siyenpre mos esta esplikando los famozos sityos de la sivda.

Kuando vinimos a la punta del puente mos mostro la famoza asuvida de GALATA….YUKSEK KALDIRIM.

Papu Yako le espliko la mijor forma de ir a kaza en el baryo de TOPHANE. Ir i pasar por DOMUZ SOKAK ! La «Kaye de Puerkos» !

Dirijirmos en Bankalar caddesi, ir a Tozkoparan antes de las eskaleras del famozo Judio KOMONDO, tornar a la derecha, pasar la Kiyla NEVE SHALOM, pasar la koshe del Kal de loz Frankos, pasar la KULA, la pishane i abashar a TOPHANE.

Este sityo es ande biven munchos ERMENIS i GREGOS.

A kontinuar…

 

SHELOMIKO DARDANELLI…

Sal Amira
CHANAKKALELI, EN MIAMI USA.

 

 

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro