LA SAVOR DE PENSAR A LO KE BIVI… por Sal Amira: LA VIJITA A MI ONKLI SABETAY

Estamos pasando del lugar ande estan fabrikando el grande ayrepuerto de Estanbol, en el puevliziko de YESHILKOY i esto vyendo grandes makinas de kavakar la tyerra. Tambiyen esto vyendo  tayares/aviones de otras partes del mundo..

LIVRIKO, muy ermozo lo ke esto vyendo!..

Ya vinimos al hospital ande esta echado mi presyozo i ermozo onkli. A lo ke veyo esta hastane es muy muy grande i esta rodeyada kon parkos de mil maraviyas.

A la puerto meldo :
BAKIRKOY CIDDI HASTALIK HASTAHANESI

Dospues ke entrimos de su puerta enorme i traversimos un sentro ke tyene en medyo altos arvoles aedados, mi primo YUSEF parko el auto.

Ah madre miya… Las eskaleras i la entrada del hospital eran de marbol de kolor kahve i blanko. Yusef se dirijo a la informasyon i demando ande se topava el kerido onkli  SABETAY.

Yamaron al Doktor ke estava enkargado de kudyarlo i este le disho a mi papu ke les trusheron a su presyozo ijo muy hazino de la kavesa i ke el tenga konfiyansa ke en unos 3 mezes lo mandara a su kaza.

– AH YAKO EFENDI… TU MUJER ANULA VYENE KADA  OTRO DIYA A VER A SU PRESYADO IJO.

Una maraviya de madre tu nona! me disho a mi. Ay madre.. otra koza mas ! Este Doktor es SEFARADI… kon alkunya KOVO…..ISAK KOVO.
PISHIN ISKRIVI SU NOMBRE AL LIVRIKO…

– Venid todos, vos va yevar anda esta SABETAY.

De una puerta a la derecha de la sala salimos a una guerta en el park del hospital kon munchas siyas boyadeyadaz/pintadaz en blanko, i en una de eyas estava asentado el presyozo onkli miyo

A kontinuar…

SHELOMIKO DARDANELLI…

Sal Amira
CHANAKKALELI, EN MIAMI USA.

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro