eSefarad Noticias del Mundo Sefaradi
El pranso ke dieron Beki i HAYIM Gormezano en muestra honor, sus vijitantes…
La tiya Beki mos rekomendo ke fueramos a lavarmos las manos i eya vino detras de mozotros, lavo la kara de Yako mi ermaniko i mos asentimos en la meza de la largura de de la sala de komer.
Yo me asenti allado del ijo del onkli YUSEF ke solo avla en TURKO i menos en Espanyol. A lo ke el me konto, era un avukato ke estudyo
en ANKARA, la kapital de TURKIYE… Estudyo INGLEZ i FRANSEZ i laz leyes ke pertenesen a estas nasyones. Me konto ke las nasyones AUSTRALYANAS, INGLEZAS i otras nasyones trataron de konkistar TURKIYA …
Estan establesyendo semeteryoz para darles onor a sus soldados ke muryeron en esta guerra… Sigio kontandome de mi leshano primo YUSEF ke ganava muy bueno su vida siendo avukato en GALPOLI i ke teniya 21 ayudantes lavorando en su ofisina…
Me recomendo ke me ambeze INGLEZ pishin ke yegara a ESTANBOL porke la lingua INGLEZA iva dominar el mundo…
Ah Senyor del Mundo… Las komidas ke ay en esta meza nunka las tengo visto! Primero supa de garvansos. Dos formas de peshkado. A la izgara/grill i de guevo i limon… Karniyarik (komida Ottomana de berendjena kon karne tartikada) kon pinyones i uvas sekas, alzete de oliva….iiiiiii pilav/aroz al istilo ERMENI, PAN FRAJOLA. KE SAVOR ESTE PAN.
Ay un couple de ZINGANOS ayudando a la tiya BEKI. Este marido i mujer biven allado de la kaza grande en una kaza chikitika kon sus dos ijikas… Es ke Yusef no es kazado i bive en esta kaza kon su padre i madre i envita lo mas de sus mushteris/klientes a pranseyar en la kaza grande..
Ooooooo, tambiyen kontare ke el tiyo HAYIM i su famiya GORMEZANO tyenen monopoliya de DJOYARIYAZ en GALIPOLI, areglan i venden djoyas a las mil maraviyas ama no les veyo en eyos dinguna grandeza i me syento muy kontento asentado en esta meza giganteska…
SALAMONIKO KON SENTIMYENTOZ
RIKOZ DE BIVIR EN EL STILO SEFARADI
Sal Amira
CHANAKKALELI, EN MIAMI USA.
Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.
Fuente: Publicado en Sefaradimuestro – https://groups.yahoo.com/neo/groups/Sefaradimuestro
