LA SAVOR DE PENSAR A LO KE BIVI… por Sal Amira: LA SAVOR DE LOS BEZOS DE MI MADRE EN SUS BRASOS

BRASOS APRETADOS, BEZOS DULSES, LAGRIMAS DE UNA MADRE KE AGORA SE MERESE FELISIDAD TENDYENDO A SUS IJOS OTRA VEZ ARYENTO DE SUS BRASOS.

Primo Yusef vyendo esta retrato enpeso a yorar, yorar komo un ninyo. Al papu sus lagrimas koryendole ensima sus mustachos grandes a la Turka.

Mama pishin se kito el hashvari de la kavesa i les disho a papu i a Yusef : Buyrun, ke se asenten, ke les vo azer kafe en el MANGAL/ el brasero kon yamas de kimur/charcoal.

YUSEF pishin ke vido el mangal, le rekomendo a mama ke kinte el mangal kon kimur a fuera por ke estava siguro ke era el kimur ke le estava dando las dolorezs de kavesa.

MAMA kito el mangal afuera a la sala.

Yusef deklaro ke ya era tyenpo de yevar a PAPU a su kaza, abrasar su tiya Anula i aresentarse en el otel suyo ke se topava en Taksim, una area sharonfonfon en Estanbol en akel tiempo!  Kontiniyo ke antes de irse atras a GELIBOLU, ya iva vinir a verla.

Kidimos solos… MAMA mos abraso otra vez porke no se artava de abrasarmos. DE SINTIRMOS EN SU PECHO..

Mos disho ke baba vendriya a kaza en una ora i ke mos lavemos las manos i la kara otra ves…ke kuando baba mos veyga iva salir loko de alegriya!

A kontinuar…

SALAMONIKO AMIRA
OPTIMISTO CANAKKALELI

 

Sal Amira
CHANAKKALELI, EN MIAMI USA.

 

 

Rengrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro